ICH pendit die voglerinne vnd wir wernher, Chunrat vnd vlrich ir Sun die vogler ueriechen offenbar an disem brieff vnd thun chundt allen den, die in sehent, horent oder lesent, das wir vnser hoffstet ze Maurkirchen versucht vnd vnuersucht mit allen den rechten, und wir si gehabt haben, ze chauffen geben haben hern ortolff dem Teuffenpecken vnser frawen Caplan ze Maurkirchen vmb Siben pfundt Salczpurger pfenning mit sogetaner beschaidenhait, ob wir den vorgenanten hern ortolffen mit den vorgeschriben pfenning manen zwischen hinne vnd liechtmess, die schierst koment, darnach vber ein jar, so sindt vnser hofstet an allen krieg gar vnd gancz wider vnser sam ee. Enta^et wir des nicht, so ists sein gothaustes (sic) gut vnd schaff damit furbas, was er wil. wa^er aber, das der offt genandt her ortolff in der frist nicht enwer, das got nicht enwelle, So hat vnser frawe zu Maurkirchen alle die recht an den selben hofsteten, als hie geschriben stet, vnd wann wir nicht aigner jnsigel enhaben, geben wir im disen brieff uersigelten mit vnsers swager Fridrichs des Scho^etinger jnsigel. Ich Fridrich der Scho^etinger uergich an disem brieff, das mich ver pendit mein swiger die voglerjnne vnd wernher, chunradt vnd vlreich die vogler mein sweger gepeten haben, das ich die sach uerpinde vnd vergwisse mit meinem jnsigel vnd ir auch zeug sej mit andern pider lewten, die da pej gewesen sindt, Das ist herr herbort pfarrer zu Rospach, her pauls, her volckmar, her Reycher gesessen (gesellen?) zu Maurkirchen, Eglolff der Trost, hainrich der mair von Sand Johanns vnd Cunrat der herrenhons. Das ist geschehen zu Maurkirchen, do von cristes gepurdt warn tausent jar, drew hundert jar, darnach in dem drew vnd dreissigisten jar an sand Michels tag.

Source Fulltext: OÖUB 6 (Wien 1972), S. 106, Nr. 96