Ich George vnd Ich Rvdeger vnd Ich Stephan Die Prvdare von Havnvelde Wir veriehen vnd Tvn chvnt allen den, die disen prief lesent oder horent esen, Die nu lebent vnd hernach chvnftich sint, Daz wir mit gvtem willen vnd gunst vnserr Erben, mit verdachtem mvte nach vnserr pesten vreunde Rat zv der zeit, da wir ez wol getvn mochten, Recht vnd redlichen verchauft haben vnsers Rechten aygens vnd anerstorben Erbegvtes vnsern weingarten, Der da leit ze Piestnikch vnd haizzet der Tvschan mit allem dem nutzze vnd rechte als vnser vodern vnd auch wir denselben weingarten in aygens gewer her pracht haben, vmb fvmftzich Phunt phenninge wienner Mvntzze. Der wir gar vnd gentzlichen verricht vnd gewert sein, Dem Erbern Herren hern Vlrichen von Pergawe, zv den Zeiten Hofmaister Hertzog Albrechtes in O^esterriche vnd in Steyr vnd vron Offmeyen seiner hausvrowen vnd Ir paider Erben, Die Sev nu habent vnd fvrbaz mit Einander gewinnent, Ledichlichen vnd vreilichen ze haben vnd fvrbaz allen jren frumen da mit ze schaffen, verchavffen, versetzzen vnd geben, swem sev wellen, als jn das wol chome vnd fvge an allen irresal. Vnd durch pezzer sicherhait so setzzen wir vns jch vorgenanter George vnd jch Rv^edeger vnd jch Stephan Die Prv^edere von Havnvelde vnuerschaidenlichen mit sampt vnsern Erben Dem egenanten hern Vlrichen von Pergawe vnd vron Offmeyen seiner Hausvrowen vnd jr paider Erben vber den vorgenanten weingarten ze rechtem gewern vnd scherm fvr alle ansprach, als aygens Recht ist vnd des Landes Rechte ze O^esterriche. Vnd swaz In fvrbaz mit Rechte dar an abe get, Das schvllen sev haben vnuerschaidenlichen auff vns vnd auf allem vnserm Gvt, das wir haben jn dem Lande ze O^esterriche, wir sein Lebentig oder Tode. Vnd daz der chauf vnd die Rede fvrbaz also staete sei vnd vntzebrochen beleibe, Dar vber so geben wir In disen prief zv einem offen vrchvnde vnd zv einem waren gezevge vnd zv einer Ewigen vestnunge versigelten mit vnser dreir Insigeln vnd mit der Erbern herren jnsigeln vnserr gvten vrevnde, hern Rvdolffes von Potendorff, hern Otten vnd hern Albers der Prvdere von Celkingen vnd hern Mavricius von Haunvelde vnsers vettern, Die diese sache gezevge sint mit jrn Insigeln, vnd ander Erber Levte genvech. Diser prief ist geben ze wienne nach christes gepvrt Drevtzehen Hundert Jar, darnach in dem fvmf vnd dreizzigistem Jar an dem Palmen Tage.

Source Fulltext: OÖUB 6 (Wien 1972), S. 156f., Nr. 151