Wier Chunrat von gots gnaden Pyscholf ze Chyemse, Ich Ru°dolf von Liechtenstain Chamrer in Steyer, jch Wernhart der Grans vnd ich Eberhart von Walsse Lantrichter oberhalb der Ens wier veriehen mit disem prief vnd tuen chunt allen den, di in sehent, ho^erent. oder lesent, Daz ain chrieg gewesen ist zwischen herm Herdegen von Pettave marschalch in Steyer an aim tail vnd zwischen herm Fridreichen von Pettave marschalch in Steyer sein pru^eder an dem andern tail vm di behausung ze Pettave, di sev von dem Ernwu^erdigen vnserm gnedigen herren dem Pischolf von Salczpu^erch vnd dem gotshau^es ze lehen habent vnd swaz in ze pu^erchut darzue geuellet. des selben iers chriegs vm di behausung vnd swaz in darzue geuallen mag ze pu^erchu^et, sint sev paid mit veraintem willen vm alle sach hinter vns gegangen vnd habent v^ens ez in vnser hant gegeben, swaz wier dar v^eber sprechen, daz sev daz paidenthalben staet haben schullen vnd wellen, dar vm, daz sev vnd ir erben furbaz an chrieg beleiben, so sprechen wier des ersten, daz der eltist pei der behau^esung beleiben sol vnd die verantwurtten sol vnd schullen doch all nu^ecze, di da von geuallent, geleich vnder sev getailt werden, doch sol der eltist der selben nu^etze auzlazzer sein mit der andern rat vnd willen. Wier sprechen auch, ob di behausung icht chriegs an gieng von der herschaft . . . . . . vnd von des Landes notdurft, so schu^ellen di andern dem oder den, di in die behausung dann inn habent, geholfen sein mit zwelf hellmen in ier selbes chost. Geschaech auch, daz sev icht red oder chainerlai sach an gieng von der herschaft oder von ander yemen, daz di behausung an traet, daz sol der eltist weder verantwu^ertten noch icht tuen, denne mit der andern rat vnd willen, als sev sein mit ein ander v^eberain werdent. Taet erz aber daru^eber, daz sol dehain chraft haben. Torwaertel vnd wachter, der man zue der behausung bedarf, sol der oder die berichten, di die behausung inn habent; swaz aber der behausung not ist an dachen, daz schu^ellen sev mit ein ander pezzern vnd gleich tragen. Waer auch, daz sev oder ier erben icht an geuiell von ierm vettern, ob der ab gieng an erben, so schu^ellen die behausung di eltisten zwen inn haben vnd den andern gepunden sein, swaz oben verschriben ist. Daru^eber ze v^erchu^ende vnd ze ainer gedenchnu^esse diser berichtung haben wier all vier disen prief versigelt mit vnserm anhangenden Insigeln. Ich Herdegn vnd ich Fridreich pru^eder von Pettave marschalch in Steyer auch hie mit disem prief veriehen vnd verpinden vns fu^er v^ens vnd v^enser erben, swaz v^enser vor geschriben herren vnd vreunt gesprochen habent vnd an disem prief verschriben, daz wier daz willichleich vnd gaenczleich staet haben wellen vnd vnzebrochenleich folfu^eern vnd hahen des ze v^erchu^ende v^enser paider Insigel an disen prief zue den iern. Der prief ist gegeben datz Salczpu^erch nach christs gepurde dreutzehen hundert iar, darnach in dem siben vnd dreizzigisten iar des Mitichens nach vnser vrowen tag, als si geparn wart.

Source Fulltext: OÖUB 6 (Wien 1972), S. 249f., Nr. 244