Ich Vlreich der Lazperger Schuczzemaister jn Osterrich vnd jch Chvnigvnt seine Hausvrowe wir veriehen vnd Tvn chvnt allen den, die disen prief lesent oder horent lesen, Die nv lebent vnd hernach chvnftich sint, Daz wir vns mit guten willen verlubt vnd verpvnden haben an alles geverde gegen den Erbern Gaistlichen Leuten Den Herren von dem Deutschen haus ze Wienne vnd jren Nachchomen vmb daz Grunthrechte achczehen wienner phenninge, Die sev habent auf vnserm Haus, daz da leit jn der Schavflukchen ze Wienne zenaechst hern Weycharts haus von Topel, daz wir jn die furbaz vnd vnser Erben alle jar da von dienne schullen vnuerzogenlichen jn allem dem Re\achten, als man ander Gruntrêcht dint jn der stat ze Wienne vnd sev des von alter recht gehabt haben. Daz loben wir jn ze laisten mit vnsern Trewen vnd geben jn dar vber disen brief ze einem offen vrchunde vnd ze aynem waren gezeuge vnd ze einer Ewigen vestenvnge versigelten mit Vnserm Insigel. Diser prief ist geben ze Wienne nach Christes gepvrt dreutzehen hvndert jar, dar nach in dem syben vnd drei\ezzigistem jar an sand johans Tage ze Svniwenden.

Source Fulltext: OÖUB 6 (Wien 1972), S. 239, Nr. 236