Ich V^etz der schaffer Richter ze den zeiten in der Vreinstat vnd mein Hausvrowe vro Katrei vnd alle vnser Erben veriehen offenwar an disem Prief vnd tuen chunt allen den, die in sehent oder horent lesen, di nv lebent oder her nach chvnftig sind, daz wier mit wol bedachtem muet vnd nach vnserr pesten vrevnt rat haben versetzt vnsern hof datz Lesten mit alle dev, vnd dar zv gehort, zeholtz vnd ze veld, versuecht vnd vnuersuecht vnd allez daz, daz wier dar zve gechauft haben vnd daz dar in gehort vnd der vnser vreiz aigen was, dem erbern manne Vlreichen dem Ochslein vnd seiner Hausvrowen vron Elspeten vnd allen iern Erben vmb Sechzich phunt phening alter Wienner munz, der si vns gancz vnd gar gewert habent vnd auch verricht sein. Vnd wer daz, daz in den vorgenanten hof ieman ze chrieg tet vnd daz dar in gehort, den selben chrieg sulle wier in ausrichtig machen also lantes reht ist vnd auch anderz vreiz aigen reht hat. Wer auer daz, daz furbaz meiner erben oder ander ieman wolt chriegen nach dem vorgenanten hof, der selb sol dem vorgenanten Vlreichen dem Ochslein vnd seinen Erben Sechzich phunt wienner phennig wider geben vnd sol im auch der vorgenant Vlreich der Ochsel vnd sein Erben den selben hof wider ze losen geben, vnd swaz dem vorgenantem Vlreichen dem Ochslein vnd seinen Erben dar vber an den sachen ab gieng, daz sullen si haben auf vnsern trewn vnd auf alle dev, vnd wier haben in dem Lant. Diser wandlung vnd auch der sach sint zeug Chvnrat der Swanter, Haynreich der Slinger, Chvnrat der Ammolf, Seyfrid am marcht, Vlreich der Prueschinch, Haynreich der Swab, Werentzel der ivng Prantsteter vnd anderr pider leut genueg. Vnd daz in di sach vnd auch di wandlung stet vnd vnuerchert beleib, dar vber gib ich in disen offen Prief zv einem vrchund vnd zu einem warn gezeug mit meim anhangunden Insidel wol versidelt vnd bestet fuer allen chvnftigen chrieg. der prief ist gegeben nach Christ gepuerd Drevzehenhvndert Jar, darnach in dem acht vnd dreizzigisten Jar an sand Giligen tag.

Source Fulltext: OÖUB 6 (Wien 1972), S. 278f., Nr. 275