Wir Albrecht etc. un wir Johanna von desselben Gots Gnaden Herzoginn derselben Land veriehen und thun chunt, daz wir unserm getrewen lieben Graff Hainrich von Schownberch ze rechter haimb stewr unserer lieben Mume Elizabeth Grefin von Ochenstein seiner Hausfrowen gelubt, verhaizzen haben tausent phunt Wienner phennig, der wir in genzlich richten un weren sullen, darnach so er bei ir geleit, auf Sant Michels tag, der dan schirist chumt, fumff hundert phunt und hinach üher ein ganzes jar die ander fumff hundert phunt auch auf Sant Michels tag, der darnach chunfftig ist, von vnser Mautt ze Lintz an allen verziehen; wer aber, das Gott nit geb, daz wir Herzog Albrecht abgiengen, e daz vorgenant verrichtet wurde, so hat unser lieber Brudter Hertzog Ott gelubt un vertrostet den vorgenanten Graf Hainrich von Schowmberch un unsere Mume Elizabet Grefin von Ochenstain, daz er si desselben guts an unser stat richten und weren soll in aller der weiz als vorgeschriben stet, un wir obgenant hertzog Ott verhaizzen und verriehen allez daz stet ze behalten, ze laisten und ze volfu^eren an allez geverd, daz vor an disen brief geschriben un benennet ist. daruber ze eine offen urchundt un sicherhait so haben wir mit sampt unsern Bruder hertzog Albrecht un Vrowen Johanna seiner hertzoginn unserer lieben Swester unser Insigel zu iren insigeln gehangen an disen brief. Datum feria sexta proxima ante conversionem Sancti Pauli anno Domini MCCCXXXVIII.

Source Fulltext: OÖUB 6 (Wien 1972), S. 260, Nr. 255