Ich Wernhart Harocher meins Hern von Pazzow Purgraf tze Partenstain Verich offenlich mit dem Brif vnd tun chunt allen den, di in sehent oder horent lesen, Daz ich mich vor meinem herrn vnd seinem Rat verpunden han, daz ich auf di vorgenanten Vest tze Portenstain verpawen sol Sechtzig pfunt Pazzower pfenning meins aigen gutes vnd sol daz tun inner drin Jaren von hevt dem tag, vnd daz ich daz dester vreilicher vnd nützlicher tun mug, Hat mir mein vorgenanter Herr mit seines Capitels willen vnd gunst her wider verhaizzen, daz er noch sein nachchomen mich noch mein Erben da selbs nicht enthausen sol als lang, vntz er mich vnd mein Erben der selben Sechtzig pfunt pfenning gaentzlich gericht. Wer auch, daz ich inner den selben drein Jaren nicht enwer, Swaz ich dann an den Selben Sechtzig pfunt pfenning nicht verpawet hiet, daz schullen mein Erben ervollen vnd sullen auch di selben vest inn haben vnd meins herren von Pazzow Purgrafen da sein in all der weis, als vor verschriben ist. Wer auch, daz ich oder mein Erben di vorgenanten Sechtzig pfunt pfenning inner den selben drin Jaren an der selben Vest mit ainer gewizzen nicht verpawten, so ist mein herr noch sein nachchommen, noch sein Gotzhaus mir noch meinen Erben nichtz gepunden, des vor verschriben ist. Ist awer, daz ich oder mein Erben di selben Sechtzig pfunt verpawen, swenn dann mein Herr oder sein nachchomen mier oder mein Erben nach den selben drin Jaren di selben pfenning gebent, so mugen si auf di Selben vest behausen, swer in dar tzu gevellet. Di weil auch mein Herr mich oder mein Erben der vorgenanten pfenning nicht richtet, so sol ich oder mein Erben im oder seinem nachchomen Sweren, mit der selben vest tze warten mit trewen, als ander sein Purgrafen. Dar vber tze vrchund gib ich den Brief versigelten mit meinem anhangunden Insigel. Der ist geben tze Pazzow an Sand Vlreichs tag Nach Christus geburd Drevtzehen Hundert Jar, Darnach in dem acht vnd Dreizzkistem Jar.

Source Fulltext: OÖUB 6 (Wien 1972), S. 275f., Nr. 271