Ich Zmiel von Zuczgras, der Mezzinpechinn prueder vnd ich Offmei sein Hausvrowe Wir veriehen vnd tuen chunt an dem prief allen den, di in sehent oder ho^erent lesen, di nu lebent oder her nach chu^emftig sind, Daz wir mit aller vnser Erben guten willen vnd gunst, mit verdachten mu^et vnd mit gesampter hant zu der zeit, do wir is wol getuen mochten, Verchauft haben vnsers rechten aigens vier vnd achzich phenning vnd vier pfunt Wienner pfenning geltes, di da ligent datz Rorbach in Hainuelder Pfarre, auf dem halben dorf vnd alle dev, vnd dar zu geho^eret, Es sei ze veld oder ze dorf, gestift vnd vngestift, versucht vnd vnuersucht, swie so daz genant ist. Die vorgenanten gu^elt haben wir recht vnd redleich verchauft vnd geben mit allem dem nutz vnd rechten, als wir si in aigens gewer her pracht haben vnd als si von alter her chomen ist, Vmb sechsthalb pfunt vnd vmb Viertzig pfunt wienner pfenning, Der wir Recht vnd redleich verricht vnd gewert sein, Dem Erbern herren hern Stephan von Hohenberch vnd seiner Hausvrowen Alhaiden vnd allen irn Erben furbaz ledichleich vnd vreileich ze haben vnd allen iren frumen da mit ze schaffen, verchauffen, versetzen vnd geben, swem si wellen an allen irrsal. Vnd dar vber zu einer pezzern sicherhait, so setzen wir vns, ich zmiel von Zuczgras vnd ich Offmei sein Hausvrowe vnd ich Hainreich der Heusler von Seserndorf, vnd ich Elzbet sein Hausvrowe vnuerschaidenlich mit sampt allen vnsern Erben vber di vorgesprochen gu^elt, als vor an disem brief geschrieben stet, Dem vorgenanten hern Stephan von Hohenberch vnd seiner Hausvrowen vroen Alhaiden vnd allen irn Erben ze rechten geweren vnd scherm für alle ansprach, als aigens recht ist vnd dez Landes recht ze O^esterrich. Waer aber, daz si mit recht an der vorgesprochen Gu^elt ich chrieges oder ansprach gebunnen, von wem daz wer, daz sullen wir in an allen iren schaden alles ausrichten, Vnd sullen auch si daz haben auf vns vnd auf allem vnserm gut, daz wir haben in dem Lande ze O^esterrich vnd in Merchern, wir sein lebentich oder to^ed. Vnd daz diser chauf fürbas also stet vnd vntzebrochen beleibe, Dar vmb so geben wir in diesen prief zu einem offen vrchunt vnd waren gezeug diser sache, versigelten mit vnsern Insigeln. Der prief ist geben nach Christes gepu^ert Dreutzehen hundert iar, dar nach in dem Acht vnd dreizzigisten iar an sand Vlreichs tag.

Source Fulltext: OÖUB 6 (Wien 1972), S. 274f., Nr. 270