Wir Kathrey von Toufers Tu°n chunt offenleich mit disem priefe, Daz vns die Edle Leut vnser hertzenlieben Su^en Vlreich von Waldse Hauptman in Steyer vnd sein Pru^eder Friderich gar vnd gentzleich gewert habent alles des gu^etes, des si vns schuldich warn an der losung, da si vnser Leut vnd gu^et, Ritter vnd Chnecht in Steyer, morgengab vnd haimstewer, als wir es gehabt haben von ihrem vater seligem vnserm lieben wirte, von vns gelo^est habent daz selbe vorbenante leut vnd gu°t. Vnd erchennen, ob wir noch dehain prief von in oder irem Vater dar vmb inne heten, daz die nicht chraft haben vnd to^et sint. Mit vrchu^end dises priefs vnder vnserm anhangenden Insigel versigelt, Der geben ist auf Pruk, do von Christes gebu^ert ergangen warn Tousent vnd dreu hundert Jar, dar nach in dem Acht vnd dreizzigsten Jare an dem tag sand Peters vnd sand Pauls der zwelfboten.

Source Fulltext: OÖUB 6 (Wien 1972), S. 272f., Nr. 268