Ich Ololt von Russpach vnd jch Katrei sein hansfrowe wier verriehen an disem prief vnd tuen chunt allen leuten, daz wier mit wol bedochtem mu^et, mit zeitigem Rat vnser pesten friunt, mit gunst vnd mit willen aller vnser erben, mit gesampter hant zv der zeit, do wier iz wol getu°n mochte, verchaufft vnd hingegeben haben vnsers freyn aygen sechtzig pfenning geltes, die,man alle jare dient halbe an sant go^ergen tag vnd halbe an sant michels tag vnd ligent zu steten auf einer hofstat, die leit zenochst Otten dem gvmpen, vnd haben die gegeben vmb Ochtzehen schilling pfenning wienner mvnz, der wier gor vnd gentzleich verricht vnd gewert sein, den erbern leuten den purigern vnd der gemain zv steten, die habent si gechaufft zv dem liecht dem heiligen herren sant vlreichen vnd dem gotshaus zv steten zv lobe vnd ze eren vnd allen iern vordern vnd ien selben zv Hilf vnd ze trost also beschaidenleich, wer zechmaister zv steten ist, daz der ewichleichen die selben gult innemen schol vnd schol daz gotshaus alle jar domit beleuchten, vnd haben auch in die oftgenanten gult gegeben frey vnd ledige zv versetzen vnd zv verchauffen vnd geben, swem si wellen, an alle chlag vnd ierrunge. vnd durich pesser sicherhait setzen wier vns der gemain zv steten zv rechtem scherm vnd gewern fu°r alle ansproch, als lechens recht ist vnd des landes recht ze osterreich, vnd wann wier selber nicht aygens insigels haben, des geben wier den erbern leuten gemainchleich von steten disen prief zv einem woren gezeug versigelten mit vnsers besvndern friundes insigel an vnser stat purcharts des slegels von geitschesteten vnd mit des erbern Herren insigel hern wernharts von chernebrunn vnd mit hainreichs des Hu^etstokches insigel von Ritzendorf, die baid gezeug sind mit iern insigeln. vnd sint des gezeug die erbern leut Ololt von Retz, Okher puriger von newmburch, Chunrat der chuepain, pertelmee der nvsser, Andre der wagenchnecht, leupolt von molmonsdorf vnd ander erber leut genuech, den die sache wol chunt ist. Der prief ist geben nach Christes gepu^erd Dreutzehen Hvndert jare, dornoch in dem newn vnd dreizgistem iar an dem Svnebent abent.

Source Fulltext: OÖUB 6 (Wien 1972), S. 299f., Nr. 296