Ich Dyepolt der Cherspeche Vnd jch Margret sein hausvrawe, Wir veriehen vnd tv^en chunt allen den, di disen Brief sehent oder ho^erent lesen, Daz wir mit wol bedahtem mv^et, mit gesampter hant vnd mit vnser erben gu^etem willen zu der zeit, do wir daz wol getv^en mahten, ledichleich vnd gentzleich durich vnser sel hael willen gegebn habn vnsers rehten chauf aygens ainen Hof an der Gaez o^ed den wir vmb siben phunt wienner phenning chauften mit allem dem, daz da zue geho^ert, swie so daz genant, do man alle jar von dienet ain halbes phunt an vier wienne phenning an Sand Po^elten vnd Sand Mychels tagn, der Chappellen hintz Traysem vnd besunder auf Sand johans ewangelist alter da selb Also, daz der Chapplan der selben Chappellen, swer der ist, den selben Hof vnd swaz da zue geho^eret, furbaz ewichleich schol habn mit allem rehten vnd nv^etzze, als wir den enher gehabt habn in rehter ayˆgens gwer, Doch also, daz der selb Hof vnd swaz da zue geho^ert, von der egenanten Chappellen furbaz niht werd verchumbert, verchauffet noch gevroˆmdet mit dhainen sachen. Vnd durich der vnd aller trewen willen, die wir dem selben Gotshaus habn erzaiget, hat vns her Hainreich zu den zeiten Chapplan der selben Chapellen ze Traysem mit seiner lehenherren hant vnd mit vrchunde ditz briefs gelobt vnd verhaizzen mit seinen trewen., daz vnsern seln vnd vnsern vadern vnd nahchomen ze trast jn der egenanten Chapellen ze Traysem auf Sand johans ewangelist alter furbaz ewichleich von im vnd allen seinen nahchomen Chapplanen der selben Chappellen, swer die sein, in igleichen wochen ayn messe schol gesprochen werden on allev irrvng vnd swo daz von dem selben Hainreichen vnd seinen nahchomen wurd gesaumet, so schulle wir oder nah vns vnser nahst erben vns on allev widerred des vargenanten Hofs gêntzleich wider vnderwinden, vnd den so lang inne inne (sic) habn, vntz daz die selbe saumpthait von in gentzleich vnd vollichleichen werd gepezzert. Vnd dar vmb daz alles daz, daz var geschriben ist, also stêt vnd vnzebrochen beleibe, gebe wir disen Brief versigelten mit meinem des vargenanten Dyepolts jnsigel vnd mit der ebenanten Lehnherren hern Dietreichs vnd hern Stephans von Hahenberch jnsigeln. Der Brief ist gebn nach Christburd vber Tausent jar, drevhundert iar. in dem ayn vnd virtzigisten jar An Sand Go^erigen tag.

Source Fulltext: OÖUB 6 (Wien 1972), S. 374f., Nr. 370