Ich Otacher der Gusner, ich Asan sein Hausurow, ich Vlreich der Gusner, ich Peter vnd Jacob vnd Otacher die Gusner vnd all vnser Eriben wir vergehen offenleichen an disem brif vnd tun chunt allen den, di in horent lesen oder lesent, di nv sind oder noch hernach chumftig werdent, daz wir mit wolbedachtem mu^et vnd mit willen aller vnser Eriben reht vnd redleichen cze chauffen haben geben mit des vogtes hant ze Wels vnd mit aller stet vnser Hu^eb ze Strazz gelegen in Lochchiricher Pharr, die Herzogichs Aygen ist, mit allev dev, vnd dar zv gehort ze holcz, ze veld, versucht vnd vnuersucht, gestift vnd vngestift den Edeln vnsern liben genedigen herren hern Reinprechten vnd hern Fridreichen Prudern von walse vnd iren Eriben vmb Neun vnd funczich phunt wienner phenning, der si vns gancz vnd gar verricht vnd gewert habent vnd sullen ouch der vorgenanten Hub ir scherm vnd gewer sein fur alle ansprach an aller der stat, da in vnd iren Erben des not geschieht, als des Lancz reht ist ob der Ens. Tetten aber wir des nicht, waz si des schaden nemen, den si pey iren trewen gesprechen mochten, den sullen wir in abtu^en vnd widerchern, vnd sullen daz haben auf vns vnd aller vnser hab, wo wir di haben, versucht vnd vnuersucht vnd vns darauf notten vnd phenden an alles recht als verr, vnczt si irs Schadens zv choment. Ez sol ouch daz egenant gu^et alle Jar ains daz vogttayden dacz Cell su^echen vnd nicht mer. Wer aber anders darauf icht, daz sullen wir in auzrichten, daz in die Hub ledig vnd frey wert, als wir in di gegeben haben, wo wir des nicht enteten, so sullen si vns aber notten vnd phenden auf aller vnser hab, wo si di an choment, an reht mit vnserm guten willen als lang, vnczt wir in di vorgenanten hub auzrichten an allen schaden. Vnd daz in di wandlung also stet von vns peleib, Dar vber geben wir in disen brif jch vorgenanter Otacher der Gusner vnd ich Vlreich der Gusner sein Su^en gesigelten mit vnser payder anhangunten Insigeln. Ich Peter, Jacob vnd Otacher di Gusner vergechen, daz wir nicht aygner Insigel haben, dar vber verpinden wir vns vnter vnsers egenanten Vaters Otachers Insigel des Gusner vnd vnter vnsers Bruders Insigel vlreichs aller der gelub stet ze behalten, als vor geschriben stet. Daz ist geschehen nach Christes gepvrd vber Dreiczechenhundert Jar, dar nach in dem zway vnd viertzkistem Jar an dem Antlaz tag.

Source Fulltext: OÖUB 6 (Wien 1972), S. 406f., Nr. 403