Ich Chadolt von Altenburch Vergich vnd tv^en chvnt allen den, die disen brief lesent oder ho^erent lesen, die nv^e lebent vnd hernach Chunftich sint, Daz ich mit meiner erben gu^eten willen vnd gunst mit verdachtem mv^et zv der zeit, do ich iz wol getv^en mocht, verchauft han dez Ersten mit meins Lehens Herren hant dez Hochgeporn fu^ersten Hertzoge Albrechtes ze O^esterreich, ze Styr vnd ze Chernden meins rechten Lehens, daz ich von im ze Lehen gehabt han, die Manschaft der gu^elte, die hernach geschriben stet, die der Nevnwalder von mir ze Lehen gehabt hat, Dez ersten achtzehen phenning geltes in der Langenawe von dem Obern Hof von einem achtail vnd sechtzehen phenninge geltes im Du^erlos von einem Achtail vnd in dem Rotenpache auf dez Gemans Hof vnd auf Dietlabs Reut von halben tail drey helblinge vnd ein halbe phvnt phenninge geltes, In dem Mitterpach auf dez Mitterpekchen hof von drin Achtailn vier vnd zwaintzich phenninge geltes, datz winthag von einem achtail zehen phenninge geltes, datz Purgmanstorf von einem halben Lehen fumf vnd viertzich phenning geltes, vnd mit meins Lehen herren hant dez Hochgeborn fu^ersten Pischolfs albrechtes von Passawe die manschaft der dreier Metzen Chorn vnd der dreyer Metzen Gersten vnd der dreyer Metzen habern geltes, die man dient von einem achtail dez zehentes, der gelegen ist in weinberger Pharr, die Manschaft dez selben gu^etes alles han ich recht vnd redleich verchauft vnd geben mit alle dem nutz vnd recht, als ich si in Lehens gewer her pracht han, vmb achtzehen schillinge wienner phenninge, der ich gar vnd gaentzleich gewert pin, Meinen vetern hern Dietreichen vnd hern Stephan den Pru^edern von Hohenperch vnd irn erben fu^erbaz ledichleich vnd vreyleich ze haben vnd allen irn frumen da mit ze schaffen, verchauffen, versetzen vnd geben, swem si wellen an allen irresal, vnd pin auch ich der Manschaft der vorgenanten gu^elte ir recht gewern vnd scherm fu^er allen ansprach, alz Lehens recht ist vnd dez Lands recht ze Osterreich vnd gibe in dar vber disen brief ze einem warn vrchvnde diser sache versigilt mit meinem Insigil. Diser brief ist geben ze wienne nach Christes gepurt Drevtzehen hvndert iar, darnach in dem zway vnd viertzgisten iar an sant Pauls Tage, alz er bechert warde.

Source Fulltext: OÖUB 6 (Wien 1972), S. 401f., Nr. 398