Ich Alber von Oˆlecht vnd ich Agnes sein Hausvrowe Wir veriehen vnd tv^en chunt allen den, die disen prief lesent oder horent lesen, Die nv lebent vnd hernach chunftig sint, Daz wir mit guten willen vnd gunst aller vnser Erben mit verdachtem mu^ete vnd mit gesampter hant zv der zeit, da wir iz wol getun mochten, Recht vnd redleichen verchauft haben vnsers rechten Lehens, daz wir ze lehen gehabt haben von dem erbern herren hern Vlreichen von Pergawe, Hertzog Albrechts Hofmaister in O^esterrich, vnsern Hofe, der da leit ze Rutzestorf, Da anderthalb lehen Pawes vnd zwo Hofstêt in geho^erent, Vnd swaz dar zv^e gehort ze velde vnd ze Dorffe, ez sei gestift vnd vngestift, versuecht vnd vnuersu^echt, swie so daz genant ist, Mit allem dem nutze vnd rechte, als wir denselben Hofe vnuersprochenlichen in Lehens gewer herpracht haben, Vmb fvmf vnd Viertzich phvnt pheminge (sic) wienner Muntze, der wir gar vnd ganz verricht vnd gewert sein, Dem egenanten meinem herren hern Vlreichen von Pergawe, zv den zeiten Hertzog Albrechts Hofmaister in O^esterrich vnd seinen Erben fvrbaz ledichleichen vnd vreilichen zehaben vnd allen jren frvmen da mit zeschaffen, verchauffen, versetzen vnd geben, swem si wellen, als in daz aller peste cho^em vnd fu^ege an allen jrresal. Vnd durch pezzer sicherhait so setzen wir vns ich vorgenanter Alber von O^ehlecht vnd ich Agnes sein Hausvrowe vnuerschaidenlichen mit sampt allen vnsern erben dem egenanten hern Vlreichen von Pergawe vnd seinen Erben vber den vorgenanten Hofe vnd swaz dar zu^e geho^ert, als vo^er geschriben stet, ze rechtem gewern vnd scherm fu^er alle ansprache als Lehens recht ist vnd dez Landes recht ze O^esterrich. Vnd swaz in fu^erbaz mit rechte dar an abe gêt, Ob sev dehainen Chriege oder ansprache dar an gewunnen, von wem daz wêr, da von si schadehafte werden mochten, den schullen wir in mit guten willen auz richten an iren schaden vnd an alle ir mvhe. Vnd schullen daz haben vnuerschaidenlichen auf vns vnd auf allem vnserm gu^et, daz wir haben in dem Lande ze O^esterrich, wir sein Lebentig oder To^ede. Vnd daz der chauf vnd dise rede furbaz also stête sei, Dar vber so geben wir in disen brief ze ainem offen vrchunde vnd ze ainer Ewigen vestenunge versigelt mit vnserm insigel Vnd mit des erbern Ritters insigel hern Levtoldes von Wyldekche Vnd mit meines swehers insigel Jansen von Walcherstorf, Die diser sache gezeuge sint mit iren insigeln, vnd ander erber leute genu^ech. Diser prief ist geben ze wienne nach Christes gepv^ert Dreutzehen Hundert iar, darnach in dem zway vnd Viertzigistem jar an sand Larentzen Tage.

Source Fulltext: OÖUB 6 (Wien 1972), S. 421f., Nr. 417