Wir Prueder Vlreich von zierberch ze den zeiten Conmentewer vnd die Pruederschaft gemayn in dem Teutzchen Hous ze wienne Veryehen vnd Tuen chunt allen den, die disen Prif lesent oder horent lesen, die nv lebent vnd hernach chumftig sint, Daz wir mit gemaynem rate vnd mit verayntem muete ledichleichen vnd liepleichen haben lazzen Dem Hochgeborn vnd Erenwirdigen Herren Graf Ludweigen von O^etingen vnd alle seinen Nachomen durch der besundern gnaden vnd trewen willen, die er vns gnedichleichen mit seiner hilfleichen fuedrung ze aller zait hat erzaigt vnd noch gern mit gantzen trewen erzaigen wil, Vnd alz wir im dez in sein gnade wol getrawen, vnserz rechten Gruntrechtes siben wienner phenning dienstez, die man vns vnd vnserm Hous Emaln ze rechtem Gruntrecht hat gedient von dem Hous, daz zenaest im Leit auf der Hochstrazz ze wienne, daz weilent Wernhers dez Schuester Vnd darnach Ruedweins dez Speismayster ist gewest, Also, daz weder wir noch alle vnser Nachomen vmb die siben phenning Gruntrechtes chain vodrunge noch dhain ansprach furbaz nimmermer schullen haben noch gewinnen, mit vrchunde dicz Prifes versigelt mit vnsers Houz jnsigel. Der Prif ist geben nach Christes gepurde Dreuzehen Hundert . jar, in dem zway vnd viertzigesten jare an sant Andres Tag.

Source Fulltext: OÖUB 6 (Wien 1972), S. 427f., Nr. 423