Ich Dietreich vnd jch Stephan von Hahenberch Bru^eeder wier veriehen vnd tvn chunt allen den, die disen brief sehent oder horent lesn, Daz wir durich vnser sel hael mit vnser paider hausvrawen vnd erben gutem willen vnd mit gesampter hant zu der zeit, do wir daz wol getvˆn mahten, habn gegebn ledichleich und gênczleich die aygenschaft ainer hofstat gelegn pei wilhamspurch in dem poˆsn do^erflein, da man alle jar von dienet an sand Po^elten tag sehtzig wienner phenning vnd zwainzig an sand Merten tag, und swaz da zue geho^ert, daz Hainreich der visinch vnd sein erben von vns ze lehen hetn, dem erbern herren hern Hainreichen vnserm Chapplan ze Traisem und dem selben Gotshaus. Vnd hat derselb her Hainreich von dem egenanten Hainreichen dem vising, seiner hausvrawen vnd erben . . mit unser hant vnd gutem willen gechauffet alles das reht, daz si vnd ir erben haben gehabt an der vorgenanten Hofstat vnd swaz da zue geho^eret an allen dingen, vmb vierdhalb phunt wienner phenning, der er si gêntzleich gewêret hat. Vnd schol der egenant her Hainreich ze sand johans datz Traisem Chapplan zu der vorgenanten seiner Chappellen die egenanten Hofstat vnd swaz da zue gehoˆrt, mit allem rehten vnd nûtze furbaz habn, als ander sein aygen, allen sei\enen frumen da mit schaffen, versetzen, verchauffen oder gebn, swem er welle, on allev irrung. Vnd zu ainer vesten bestetigung der varbeschriben vnserr gab vnd auch des chauffes, wan der egenant Hainreich der visinch niht aygens insigels hat, als er vns gepetn hat, so gebe wir dem offtgenanten hern Hainreichen Chapplans (sic) ze Traisem vnd dem selben Gotshaus disen Brief versigelten mit vnsern paiden jnsigeln. Der Brief ist gebn nah Christburd vber Tausent iar, Drevhundert iar, jn dem drev vnd virtzigisten iar An Sand Lamprehtes Tag.

Source Fulltext: OÖUB 6 (Wien 1972), S. 454, Nr. 449