Ich Chunrat von Gvndramsto^erf vnd ich Kathrey sein Hausvrowe Wier veriehen vnd tu^en chunt allen den, die disen brief lesent oder ho^erent lesen, Die nv lebent vnd hernach chunftig sint, Daz wier mit gutem willen vnd gunst aller vnserr erben, mit verdachtem mu^ete vnd mit gesampter hant zv^e der zeit, da wier ez wol getu^en mochten, Recht vnd redleichen verchaufet haben vnsers rechten Lehens, daz wir ze lehen gehabt haben von den edeln vnd den erbern herren hern Vlreichen von Pergawe vnd hern Perchtolden von Pergawe seinem bru^eder, Fvmfthalb phvnt wienner phenninge geltes, die da ligent datz Semingdorf bei der Newenstat auf vberlende vnd swaz dar zu^e gehoret, mit allem dem nutze vnd rechte, als wir die selben gulte vnuersprochenlichen in Lehens gewêr herpracht haben, vmb syben vnd Dreizzig phvnt phenninge wienner Mvntze, der wir gar vnd gantz verricht vnd gewert sein, Dem egenanten vnserm Lehenherren hern Vlreichen von Pergawe, zv den zeiten des edeln vnd des Hochgeboren Fu^ersten Hertzog albrechts Hofemaister in Osterrich vnd seinen Erben Fu^erbaz ledichlichen vnd vreylichen ze haben vnd allen seinen frvmen damit zeschaffen, verchauffen, versetzen vnd geben, swem er wil, als im daz aller beste chome vnd fu^ege an allen jrresal. Vnd dvrch pezzer sicherhait so setzen wir vns ich vorgenanter Chvnrat von Gvndramsto^erf vnd ich Kathrey sein Hausvrowe vnuerschaidenlichen mit sampt allen vnsern erben Dem egenanten hern Vlreichen von Pergawe vnd seinen erben vber die vorgenanten Fvmfthalbe phvnt geltes ze semyngdorf ze rechtem geweren vnd scherem fu^er alle ansprache, als Lehens recht ist vnd des Landes recht ze O^esterrich. Vnd swaz jm fu^erbaz mit rechte dar an abe gêt, Ob Er dehainen chrieg oder ansprache dar an gewunne, von wem daz we\ar, den schullen wir im mit guten willen auz richten an seinen schaden vnd an alle sein mvhe, Vnd sol daz haben vnuerschaidenlich auf vns vnd auf allem vnserm gu^et, daz wir haben in dem Lande ze O^esterrich, wir sein Lebentig oder To^ede. Vnd daz der Chauf vnde dise rede fu^erbaz also stete sei, Dar vber so geben wir jm disen brief ze ainem offen vrchunde vnd ze ainer Ewigen vestenuge (sic) versigelt mit vnserm jnsigel vnd mit meines prv^eder insigel Levppoltes von Gvndramstorf, der diser sache gezeug ist mit seinem jnsigel, Diser brief ist geben ze wienne nach Christs gepvrte Dreutzehen Hundert iar, darnach in dem Drev vnd viertzigistem jar an sand Pawels tage, als er bechert wart.

Source Fulltext: OÖUB 6 (Wien 1972), S. 435f., Nr. 431