Ich Alber der Pvrgraf von Gors Vergich vnd Tvn chunt allen den, die disen brief lesent oder horent lesen, Die nv lebent vnd hernach Chv^enftich sind, Daz ich mich dez mit meinen Trewen verlu°bt vnd verpvnden han gegen dem erbern Herren hern Weicharten von Winchel meinem lieben O^eheim vnd gegen seiner Hausvrowen vron Katrein vnd gegen irn Erben Vmb daz halb Haus ze Stainekk vnd vmb alles daz, daz dar zv geho^eret, swie so daz genant ist, daz ich wider si gechauft han, als ich besunderleich brief vnd jnsigil von in dar v^eber han Also, ist, daz ich vorgenanter Alber stirbe vnd an Erber, veruar, daz Sv^ene sind, dez Got nicht, enwelle, daz denne daz Halbe Haus ze Stainek vnd swaz dar zv geho^eret, swie so daz genant ist, sol ledichleichen hin wider Erben vnd geuallen auf den vorgenanten meinen O^eheim hern Weicharten von Winchel vnd auf sein Hausvrowen vron Katrein vnd auf ir baider Erben an allen chrieg vnd an alle wider rede, Da mit fv^erbaz ledichleichen vnd vreyleichen allen irn frumen ze schaffen, alz in daz aller pest wol Chvm vnd fu^eg an allen irresal. Vnd daz ditz gelu^ebe fu^erbaz also staˆet vnd vnzerbrochen beliebe, Dar vmb so gibe ich in disen brief ze einem warn Sichtigen vrchu^ende vnd ze einer Ewigen vestenung diser sach versigilten mit meinem jnsigel vnd mit meiner Swaeger jnsigiln der erbern herren hern Gvnndakchers, hern Perichtoldes, hern Rudolfes vnd hern dietreichs der Pru^eder von Losenstain, die diser sach gezeug sind mit irn jnsigiln. Diser brief ist geben ze wienne nach Christes gebu^erde Dreutzehen Hundert iar, dar nach in dem fumf vnd viertzigisten iar des naˆchsten Mittichens vor sand Agnesen Tage.

Source Fulltext: OÖUB 6 (Wien 1972), S. 502, Nr. 498