ICH Leutold vnd ich Dietreich die bru^eder von Stadekke vnd vnser erben wir veriehen vnd tun chunt allen den, die disen brief lesent oder ho^erent lesen, di nu lebent vnd hernach chu^enftich sint, daz wir vns des mit vnsern trewen verlu^obt vnd verbunden haben gegen mein Leutolts swager hern Vlreichen von Pergawe vnd gegen seinen erben vmb den zehent gelegen ze Rauhenwart, der mir zv^e meiner hausurowen vron Agnesen seiner swester, der Got gnade, gegeben ist ze rechter haimsteur nach des lants recht ze O^esterreich vnd den ich versatzt han, der mir mein leibgeding ist, daz wir den selben zehent ledigen vnd lo^esen suln von den weihennachten, die schierist cho^ement, v^eber ein iar, swenne si vns dar nach vmb manent vodernt, an alle widerrede. Tun wir des nicht, swelhen si denne vnder vns bayden dar vmb manent vnd vodernt, der sol zwen erber rittermaezzigen chnecht ieden man selb ander mit zwain pha^erden des nachsten tags dar nach hintz Wienne in ein erber gasthaus senden, da vns der vorgenant her Vlreich von Pergaw vnd sein erben hin zaigent, vnd suln die da jnne lygen vnd laysten, als inne lygens vnd laystens recht ist, vnd suln die da nimmer aus chomen, in werd ee der obgenant zehent gar vnd ga^entzleich geledigt vnd gelo^est in dem recht, alz vor verschriben ist. daz luben wir auch mit vnsern trewen. Wa^er aber, daz wir bayde abgiengen, vnd daz in der obgenant zehent nicht geledigt vnd gelo^est wa^er, so sol in denne vnser herre der hertzog in O^esterreich oder swer den gewalt an seiner stat, mit vnserm gu^etem willen an alles fu^erbot vnd an alle chlag phant antwurten von allem vnsern gu^et, daz wir haben in dem lande ze O^esterreich oder swo wir es haben, alz verre, daz si so vil gu^etes gar vnd ga^entzleich da von verricht vnd gewert werden, alz der obgenant zehent wert ist, vnd alles des schadens, dez si sein fu^erbas nach vnser bayder tode neamen, daz si bey irn trew^en gesagen mu^egen, auch gar vnd ga^entzleich da von verricht vnd gewert werden. Vnd daru^eber so geben wir in disen brief zv^e einem warn vrchu^ent diser sache versigelten mit vnsern jnsigiln vnd mit vnser oehem insigln hern weycharts von winchel vnd hern albero von Rauhenstaine, die diser sache gezeug sinde mit iren insigiln. Diser brief ist geben ze Wienne nach Christes geburd dreutzehen hundert iar, dar nach jn dem acht vnd vierczgisten iar an sant Katreyn tage.

Source Fulltext: OÖUB 7 (Wien 1876), S. 83, Nr. 84