Ich Reinprecht vnd Fridreich von Walsse von Ens vnd ich VIreich vnd Fridreich von Walsse von Grecz vnd ich Graf Yban von Pernstein vnd ich Weichart von Winchel wir veriehen mit disem prief vmb die tailung der veste, der gueter vnd aueh nv^etz, si sein aigen oder lehen, als si hernach geschriben vnd penant stent, vnserr lieben vetern vnd vreunt Eberharts vnd Hainreich von Walsse von Drosendorf, der si willichleich hinder vns sint gegangen vnd gelubt habent mit iren trewen an aides stat, was wier dar vber sprechen, das si das stet pehalten; So sprech wir von erst Eberharten den tail: Merchenstain di vest, den pavmgarten, der dar zv gehort, den mairhof mit dem pawe, mit dem wismad, das dar zve gehort vnd auch das holtz, das dar zve gehort, vnd di veste Hvetenberch mit dem holtzi das dar zv gehort vnd auch den gemaurten stochk in der Dornawe, vnd die awe vnd das wismad, das da pei leit vnd den achker vnd den pavmgarten daselbs, den nidern mairhof ze Engschachsveld vnd den pavmgarten halben den nidern tail pei der Grevlinne hof getailt twerchs vber von dem veld in das dorf. Noch ist vngetailt vischwaid, wismad, der wildpan vnd ander vrbar daselbs, swie so das genant ist, das schulln si noch geleich tailen. So peschaid wir vnd sprechen vnd tailen den andern tail dem vorgenanten Hainreichen seim prueder den tail: Di veste Engschachsveld vnd den obern mairhof vnd den pavmgarten halben den obern tail gen dem prvnne, vnd di veste ze Lesdorf vnd den mairhof mit dem pawe, so dar zv gehort, den pawmgarten vnd auch di vischbaid do selbs vnd das holtz vnd wismad, das darzv gehort; vnd andrev gueter sint noch vngetailt daselbs, weingarten, solden vnd vberlent, das dar zv gehort, das si noch geleich tailen schullen. Vnd auch was das holtz ze Merchenstain vnd ze Hvettenberch pesser ist denn das holcz, das ze Lesdorf gehort, das sol Eberhart Hainreichen widerlegen anderswo mit als guetem holcz. Wir sprechen auch, was ie dem herren vnder seiner veste gelegen ist, das schol er haben vnd schol iz dem andern widerlegen mit als gvetem gu^et anderswo. Dar nach sprech wir, das her Eherhart mit hav^es siczen vnd peleiben sol ze Potenstain von dem nechsten sand Go^ergen tag zehen ganczev iar; Doch so sol Hainreich sein prueder alle di nvtz, di geh^ernt vnd gevallent zv dem havs ze Potenstain, ez sei v^erbar, gericht, maut, phening gult, holcz, vischbaid, vismad, versuecht vnd vnuersuecht, wie so das genant ist, das schol er alles geleich halbs haben vnd nemen recht als Eberhart seinen halben tail. Vnd nach den vorgenanten zehen iaren so sol ie der herre danne aine iar oder zwai ze Potenstain mit havs sein, wie iz in oder iern erben danne aller peste fuegt. Geschech aber das, das Eberhart inner den zehen iarn ab gieng, des got nicht geb, so schullen sich auch di selben zehen iar vergangen haben vnd ab sein. Vnd wer auch das, daz si inner den zehen iarn ir setz tailen muesten oder wolden oder ob von in gelo^est wurd, so schullen aber di oft genanten zehen iar ab sein an allev widerred. Wir sprechen auch mer, welicher vnder den vorgenanten pruedern Eberharten vnd Hainreichen an erben vnd an gescheft verfu^er vnd abgienge, des selben veste vnd gueter, wie si genant sint, schol auf den andern prueder erben vnd gevallen, als ein recht ist. Vnd das der spruch vnd di tailung also stet vnd vnzebrochen peleib, dar vmb geb wir alle vorbenante disen prief versigelten mit vnsern anhangvnden insigeln. Diser prief ist gegeben nach Christes gebuerd drevzehen hvndert iar, darnach in dem nevn vnd vierczkisten iar, des nachsten svntags vor dem Palm tag.

Source Fulltext: OÖUB 7 (Wien 1876), S. 100f., Nr. 102