Ich Ott der Smatzhawser vergich vnd tun chunt — daz ich meiner lieben hawsfrawn frawn Gedrawten gemachet vnd gegeben han mein hu^eb di Obner ze Pyscholfstorf vnd meinen sitz ze Lewching vnd mein mu^el ze Lewching vnd den sitz ze Lewching (sic!) vnd allez daz dar zu geho^ert ze veld vnd ze dorff vnd vizmat besuchtz vnd vnbesuchtz mit allen rechten, eren vnd nutzen, di durch recht dar zu geho^erent, vnd di swayg ze Och also, daz si di vor genanten gut inn haben vnd niezzen sol in aller der mazz, sam ich selb vntz an iren tod, vnd daz sey dhain mein erb dar an nicht irren noch chrenchen sol, vnd ob si mich vber lebt, so sol si mir einen zeitleichen gelt auz den egenanten guten schaffen vmb mein sel vnd vmb di iren. Si sol auch mich an dhainen sachen irren noch chrenchen, ich hab vollen gewalt di vor genanten gut ze uerchumern, ze versetzen, ze uertun ob mir sein not geschech, daz got nicht engeb, daz si mich dar an nicht irren sol noch mag. Das ir daz also staet, gantz vnd vnzerbrochen beleib, daruber ze einem waren vrchund gib ich ir disen brief versigelten mit meinem insigel allez daz staet ze haben, daz oben verschriben stet. Daz ist geschehen — dreutzehen hundert iar, darnach in dem nevn vnd viertzgisten iar an sand Valteinztag.

Source Fulltext: OÖUB 7 (Wien 1876), S. 94f., Nr. 96