Ich Getraud die Widmerin vnd alle mein erben wir veriehen das ich gegeben han dem gotshauss datz Altenpurg ain guet genant das Leubeinslehen vnd ist drei schillings gelts wienner munss, funf vnd viertzig an sand Jo^ergentag vnd funf vnd viertzig phenning alter wiener munss an sand Gilgentag vnd ist auch das vorgenant guet vnser freiss aigen gewesen vnd ist gelegen in Plasenstainer pharr vnd auch mit allen den rechten vnd nutzen hab wir ietz dem vorgenanten gotshauss gegeben, als wir ietz selber in gehabt haben — also beschaidenleichen, das man vmb sechzig Pfenning kauffen sol alle jar jarleichen an vnser frauentag ze der liechtmess, wer zechmaister ze denselben zeiten datz Altenburg ist, wax ze ainer wandlung khertzen vnd viertzig pfenning sol man vns opfern mir vnd meinem wirt Fridrichen dem Widmer dem got genad, wan vnser jartag ist, vnd sechzehn sol man dem pfarrer geben, das man vns beiden vigili singe an vnserm jartag abent. Wil aber der pfarrer datz Altenburg des nicht tun weder vigili noch mess singen, so sol der zechmaister datz Altenburg den dinst vnd das gelt einnemen vnd sol dem gotshaus wax darumb kauffen zu dem liecht. Wir offen auch mer, das wir vnsern gnedigen treuen landvogt den erbern herrn von Capeln herrn Hansen vnd sein erben des gebeten haben, das er sein anhengend insigel an den brief gelegt hat wan wir aigens insigel nicht gehabt haben, vnd sol auch dem gotshaus des ehegenanten guets hern vnd scherm vnd ewiger vogt sein vnd gewer.||
Der brief ist geben — drei zehenhundert jar darnach in dem funfzigisten jar an vnser frauentag ze der liechtmess.

Source Fulltext: OÖUB 7 (Wien 1876), S. 166f., Nr. 166