Ich Marichart von Tiernstain vergich vnd tu^en chunt allen den, die disen brief lesent oder ho^erent lesen, die nv lebent vnd hernach chu^enftich sint, daz ich mit meiner erben gu^eten willen vnd gunst, mit verdachtem mu^et vnd nach meiner pestenvreunt rat zu der zeit, do ich ez wol getu^en mochte, verchauft han meinen hof gelegen ze Stadelauwe vnd alles daz, daz dar zu^e geho^eret vnd swaz ich da selbens gehabt han ze velde vnd ze do^erffe ez sey gestift oder vngestift versu^echt oder vnuersu^echt swie daz genant ist, daz mich alles mit fu^ertzicht vnd mit lo^ez an geuallen ist gegen meinem pru^eder Reymprechten von Tiernstain, do wier alles vnser erbgu^ot mit ein ander getailt haben, daz vns vnser vater her Tu^ers von Tiernstain, dem Got genade, lazzen hat. Den vorgenanten hof vnd swaz dar zu^e geho^eret, als vo^er verschriben ist, vnd swaz ich ze Stadelauwe gehabt han, han ich recht vnd redleich verchauft vnd geben mit allen den nu^etzen vnd rechten, als in mein vater vnd auch ich her pracht haben, vmb fu^emf vnd dreizzig phunt wienner pheninge, der ich gar vnd gaentzleich gewert bin, dem erbern herren hern Stephan von Ho^echenberch vnd seinen erben fu^erbaz ledichleichen vnd vreyleichen ze haben vnd allen ieren frumen da mit ze schaffen verchauffen versetzen vnd geben, swem si wellen an allen irresal. Vnd pin auch Marichart von Tiernstain vnd mein erben vnuerschaidenleich des vorgenanten gu^etes alles des egenanten hern Stephans von Ho^echenberch vnd seiner erben recht gewern vnd scherm fu^er alle ansprach nach des landes recht ze O^esterreich. Wasr aber, daz si mit recht an dem selben gu^et allem icht chrieges oder ansprach gewunnen, swaz si des schaden nement, daz suln wier in alles auz richten vnd wider chern an allen iren schaden vnd suln auch si daz haben auf v^ens vnd auf allem vnserm gu^et, daz wir haben in dem lande ze O^esterreich, wier sein lebentich oder to^ede. Vnd daz diser chauf fu^erbaz also staet vnd vntzerbrochen beleibe, dar u^eber so gib ich in disen brief zu einem warn vrchünde vnd zu einer ewigen vestnunge diser sache versigilt mit meinem jnsigil vnd mit des egenanten meins pru^eder jnsigel Reymprechtes von Tiernstain vnd mit hern Fridreichs jnsigil von Atzenprukke vnd mit hern Maricharts jnsigil des Haeusler, die diser sache gezeuge sint mit im jnsigeln. Dieser brief ist geben nach Christes gebu^erd dreutzehen hundert iar, dar nach in dem vier vnd fu^emftzgisten iar an sand Thomas tag des heiligen zwelfpoten.

Source Fulltext: OÖUB 7 (Wien 1876), S. 392f., Nr. 381