Ich Hainreich auf der Grvb Pauls dez Tvngozzinger aydem, puriger ze Linczz vergich offenleichen mit denn (sic) brief mit sampt meiner hausfrawn vro Chv^onigunten vnd mit aller vnser payder erben vnd tvnn chunt allen law^eten, di in ho^ernt sehent oder lesent, daz wier mit wol bedachtem mv^et vnd mit gu^etleichem willen vnd wart aller vnser erben recht vnd redleichen ze chauffen geben haben zu der zeit, do wier az (sic) wol getvn mochten, vnsern zehent vnd gu^et, di her nach geschriben stent, am ersten den zehent halben auf dem hof ze Chvmpolting vnd den zehent halben auf dem hof auf dem Perig, vnd den zehent auf dem hof in dem Tal, der genant ist der Pernv^oczlinn hof vnd den halben zehent ze Perigarn auf drya ho^efen vnd der lehen ist von dem wierdigen goczhaws ze Chremsmv^enster vnd den halben hof ze Perigarn, der erib ist von dem ob genanten goczhaws ze Chremsmv^enster, vnd daz gu^et in dem Dorna^ech, ist erib von dem herczogen ze O^esterreich, vnd ze Lintpu^ehel daz halb gu^et vnd ain halbs gy^etel in Wydemspekcker pharr, ist lehen von dem herczogen ze O^esterreich vnd gelegen in der vogtay, vnd di her cho^emen sint von meinem sweher Paul dem Tvngazzinger, vnd di haben wier geben dem erba^ern manne Fridreichen dem Riczzendorffer puriger ze Wells vnd seiner hausfraw^oen Margreten vnd allen iern erben aws vnser nvczz vnd gewer in di iern vmb ein gellt, dez wier gar vnd gancz von in verricht vnd gewert sein, also mit der beschayden, das wier vnd vnser erben der vor genanten gu^et vnd zehent, alls oben geschriben stet, ier vnd ierer erben recht gewer schu^ellen sein, swo in des not vnd tu^erft geschiecht, also lancz recht ist ob der Ens. Waer aber, daz in an der gewerschaft icht ab gyeng, swas sev dez schaden na^emen von vns oder von vnsern erben, den schu^ellen sev haben dacz vns vnd dacz vnsern trewn vnd auf aller vnser hab, di wier indert haben versu^echt vnd vnuersu^echt. Vnd dar v^eber ze ainem warn v^erchu^end gib ich Hainreich auf der Gru^eb in den prief versygellt mit meinem anhangvnden insygel vnd ze ainer zewgnv^ezz vnd pezzern sicherhait mit meins lieben sweher Pauls dez Tvngozzinger anhangvnden insygel iem an schaden, mit dez gvnst vnd willen di handlung geschehen ist. Der prief ist geben nach Christes gebu^erd v^eber drewczzehen hvndert iar vnd darnach in dem fu^emf vnd fv^enfczkisten iar an dem heyligen abent ze pfingsten.

Source Fulltext: OÖUB 7 (Wien 1876), S. 416f., Nr. 405