Wir Albrecht von Gotz gnaden herczog ze Osterreich ze Steyr vnd ze Kernden embieten vnsern getrewn dem rat vnd den purgern ze Wels vnser gnad vnd allez gu^et. Als wir ew vor emboten haben also gebieten wir ew aber gar ernstlich vnd wellen, jst daz vnser getrewr Reimprecht von Walsse von Ens stewr an ew vordert von den gu^etern die ir von im ze lehen habt, daz ir im der nicht gebt vnd ew des seczt vntz an vns. Wolt er ew aber darvmb no^etten oder ichts beswa^eren, daz sullt ir an vns bringen vnuertzogenlich. Geben ze Wienn an freitag vor Scolastice Lviii.

Source Fulltext: OÖUB 7 (Wien 1876), S. 556, Nr. 543