Ich Du^erinch der Sazzer vnd mit mir mein hausfrave vnd alle vnser erben gegenwu^ertig oder chu^eftig vergehen mit dem offen brief, daz wir mit wol bedachtem mu^ot vnd mit gu^etlichem willen nach rat vnserr pesten friunt zu der zeit do wir ez mit recht wol getu^on mochten, gesaczt haben als saczes recht ist Erasm dem Schreiber purger ze Steir vnd seiner hausfrav vnd seim bruder Jansen vnd allen iern erben vnsern hof genant an dem Preuneinsperg in Newenchircher pfarr gelegen, der lehen ist von vnsern genedigen herren den hertzogen in O^esterrich mit allen den rehten vnd nu^etzen di darzu geho^ernt swi di genant sint, besucht oder vnbesucht, gepawen oder vngepawen, aus vnserm nucz vnd gewer in di iren fu^er zway vnd dreizzich pfunt wienner pfenning der si vns gancz vnd gar verricht vnd gewert habent mit beraiten pfenning zu vnserr anligender notdurft der wir anders nicht verziehen mochten. Wir su^ellen auch in wider geben der obgenanten pfenning aht pfunt zu den nahst zu chu^enftigen weinahten vnd vmb di andern vier vnd zwaintzich pfunt sol er (sic) der obgenant hof ir satz sein von sant Cholmans tag der schirst chumt v^eber drev iar daz wir in nicht sullen losen. Ga^eben aber wir in der aht pfund nicht auf di obgenanten zuchu^enftigen weinahten, so sol der obgenant hof ir gechauftz gut sein an alle widerred vnd irrumb vmb die obgenanten zway vnd dreizzich pfunt pfenning. Wir sullen auch dez sacz vnd dez chauffs ir gewer sein ob sich der chauf also verget fur alle chrig vnd ansprach nach lancz recht, vnd gieng in daran icht ab daz sullen si haben auf vns vnd auf aller andrer vnserr hab wo wir di haben. Swer auch den brief von irn wegen inne hat, dem sol er sagen vnd nucz sein als Erasm dem Schreiber vnd sein erben. Daz di wandelumb also staet behalten werd, gib ich obgenanter Du^erinch der Sazzer fu^er mich vnd alle mein erben den brief versigelten mit meim insigel, vnd zu ainer guten geziuchnusse mit des erbern ritters insigel hern Niclas des Schekhen zu der zeit purkgraf ze Steir vnd der auch zu der zeit dez obgenanten hofs lehenherre ist gewesen an der fu^ersten stat vnd mit dez hant di wandelumb geschehen ist, vnd ist geschehen do man zalt von Cristi gepurtt dreuzehenhundert iar vnd in dem aecht vnd funfczichistem iar an sant Michels tag.

Source Fulltext: OÖUB 7 (Wien 1876), S. 595f., Nr. 583