Wir Rudolf etc. tun kunt, als seliger gedechtnuzze die hochgebprn fursten herczog Albrecht vnser lieber herr vnd vatter vnd herczog Ott sein bruder vnser lieber vetter weilent herczogen vnd hern der vorgenanten landen hievor schuldig waren vnd gelten solten vnserm getrewn lieben Eberharten von Walse von Lintz von sins vetterlichen erbs wegen vmb seinen tail der herschaft ze Walsse in Swaben zwai tausent mark silbers, dafur si im vnd sinen erben gesetzt hatten zu aim rechten werenden phande an allen abslag der nucze vnser purg Falkenstain vnd swaz darzu geho^eret, vnd dar vber zwai hundert phunt wienner phenning geltez auf vnser maut ze Lincz die in alle iar da von geuallen solten alz die phantbrief wo bewisent die die vorgenanten vnser vatter vnd vnser vetter seligen versigelt mit irm jngesigeln darvber gegeben hant dem vorgenanten von Walse, daz wir darvmb fur vns vnd die hochgeborn Friderich Albrecht vnd Levpolt vnser lieben pru^eder herczogen vnd herren mit sampt vns in den vorgenanten landen, der aller vollen vnd ganczen gewalt wir als der eltist vnder in yeczunt fu^eren, mit gu^eter vorbetrachtung nach rate vnsers rates vnd durch vnsers meren nutz vnd gemachs willen vberain komen sin wizzenlich mit dem vorgenanten Eberhart von Walse, daz er vns die obgenanten vnser burg Falkenstein mit aller ir zu^ogeho^erung vnd (die zway hundert phunt wienner phenning?) vf der mautt ze Lintz widergegebn vnd ledig gelassen hat genczlich, vnd haben wir in den namen als da vor fur vns vnd die egenanten vnser pru^eder vnd fur vnser aller erben den selben Eberhart von Walse von Lintz vnd seinen erben dafur ingeantwurt vnd gesetzet recht vnd redlich vnd setzen in ouch mit disem brief ze ainem rechten werenden phande ane allen abslag der nucze vnser purg ze Seusenburg vnd die vogtey ze Wels auf dem lande mit leuten gu^etern gerichten vnd gemainlich mit allen nuczen vnd diensten rechten vnd gewonheiten fryheiten vnd eren, die zu der selben purg vnd der egenanten vogtey deheines weges geho^erent, an alle geuerde also, daz der vorgenante von Walse vnd sein erben die selben purg Seusenburg vnd die vogtey ze Wels mit aller zugeho^erung als vor geschriben stat innehaben vnd niezzen sullen in phandez weise ane abslag der nutze alz lang, vncz daz wir vnd vnser pru^eder oder erben die selben purg vnd vogtey von in lo^esen mit als vil gutes als der vorgenanten vnsers vatters seligen herczog Albrechten vnd vnsers vetters seligen herczog Otten versigelte briefe der wir da vor ouch gedacht haben bewisent, daz in vormals gestanden sin die obgenanten unser purg Falkenstein vnd die zwai hundert phunt gelts vf der mautt ze Lintz, daz vns nu allez gegen disem vorgeschriben newen sacze ist ledig worden als vor beschaiden ist, wenne ouch wir vnser pru^eder oder vnser erben die obgenanten purg Seusenburg vnd die vogtey ze Wels lo^esen wellen von dem obgenanten von Walse oder sinen erben, dez sullen si vns stat tu^en vnd gehorsam sein an alle widerred vnd geuerde; aber all die wile vnd die selb losung nit geschen ist, so sullen si vns mit derselben purg ze Seusenburg warten vnd gehorsam sein wider aller menlich neman ausgenomen vns vnd dien vnsern darin vnd darus zelassen ane irn merklichen schaden als oft dez not geschicht an alle geuerde. Mit vrchund . .

Source Fulltext: OÖUB 7 (Wien 1876), S. 681f., Nr. 672