Wir Albrecht von gots gnaden burchgraf ze Nürnberch vergehen vnd tun chunt offenleich mit disem brief, daz für vns chomen ist der edel ersam Dietreich von Hohenberch vnd hat mit vnser hant gunst vnd willen recht vnd redleich gemacht seines rechten lehens daz er von vns ze lehen hat, der erbern Agnesen seiner wirtinn Rudolfs seligen tochter von Liechtenstain für sibenthalb hundert phunt wienner phenning an irr morgengab ze einem rechten satcz als saczung vnd morgengab recht ist vnd des landes recht ze O^esterreich, sein viertail an der vest Wolf'kerstorf vnd alles daz daz zu demselben viertail gehöret also mit der beschaidenheit, daz die obgenant Agnes die vorgenanten sibenthalb hundert phunt phenning ir morgengab auf dem egeschriben satcz haben sol als satzung vnd morgengab recht ist vnd des lants recht ze Osterreich, in alle dem rechten als der morgengabbrief sagt den ir der vorgenant ir wirt besunderleich dar v^eber geben hat. Vnd des ze einem vrchund vnd ze einem gezeug geben wir jr disen brief besigilten mit vnserm anhangundem insigil. Der brief ist geben nach Christes gepurd dreutzehen hundert iar dar nach in dem neun vnd fumftzgisten iar des suntags in der vasten als man singet Reminiscere.

Source Fulltext: OÖUB 7 (Wien 1876), S. 627f., Nr. 618