Wier Rudolf von Gotes gnaden bertzog ze O^esterreich ze Steyer vnd ze Kernden tu^en ehunt, daz wir mit allen geistlichen vnd weltlichen fu^ersten prelaten vnd pharrern lantherren rittern vnd chnechten vnd mit allen andern vnsern getrewen gemainlich in vnserm lande ze O^esterreich vberain chomen sein, daz wir ditz gegenwu^ertig nevn vnd fumftzkisten jars si vberheben wellen vnsrer munzze, vnd an derselben munzze stat sullen si vns in allen iern steten merchten vnd dorffern ho^efen lehen weylern vnd gerichten grozzen vnd chlainen wo die gelegen vnd wie si gnant sind, von allen iren vnd der i^eeren gastheusern tafern vnd lei^etheusern oder wo man vailen wein met oder pyer zu dem zaphen schenchet, in allem dem land ze O^esterreich vnder der Ens vnd ob der Ens als weit vnd als verre als vnser munzze von Wien ze recht gen sol, geben vnd geuallen lazzen ze vngelt richtichlich an alle ierrung mit guten trewen vngeua^erlich den zehenden phenning alles dez geltes so geuallet oder geuallen mag von allem dem wei^en met oder pyer, so in dem egenanten vnserm land geschenchet wiert dhaines weges oder verchouft zu dem zaphen von hinnen vntz zu dem nachstem sand Jorgen tag vnd von dann ain gantzes jar. Durich daz ouch die erbern . . herren ritter vnd chnecht vnd alle ander vnser getrewen edel vnd vnedel reich vnd arm in den steten vnd auf dem lande von disem vngelt ehain beswerung noch schaden enphahen, sunder daz ez tragen vnd geben allermaist fremde leut vnd gest die von andern landen zu vns gen O^esterreich wandelnt, vnd ander gemain volch daz gewo^enlich vailen wein met oder pyer vom zaphen trinchet, darumb haben wir nach rat vnsers rates vnd der egenanten lantherren wizzentlich mit guter vorbetrachtung auf gesetzet vnd setzen mit disem brief, daz man in allem dem lande ze O^esterreich daz viertal den stauff oder die mazze wie si dann gehaizzen ist, si sei chlain oder gro^ez da mit man von alter her geschenchet hat, minnern vnd chlainer machen sol gleich vmb den zehenden tail, vnd sol doch yeder man daz chlain viertail den chlainen stauff oder die chlainen mazze wie si danne gnant ist auzrueffen vnd geben nach allem seinem willen als tewer vnd vmb also vil geltes als er sust daz alt viertail oder die grozzen mazze wie si dann gnant ist geben hett. Wan also niemant chain beswerung noch schaden dauon leyden denn fremdes vnd gemain volch als vo^ergeschriben stet, durch daz aber dazselb fremde vnd gemain volch ditz aufsatzes ouch vnengolten beleiben, darumb haben wir gesetzt vnd wellen, daz man in allen gastheusern, tabern vnd leitheusern oder wo man vailen wein met oder pyer schenket, hab vnd gebe recht mazze getrewlich vnd vngeva^erlich bei nacht vnd bei tag also, daz die chlainen engstel da mit man helbert phenwert zwayrwert dreyerwert vierwert vnd minner oder mer auzmisset, die gehelen sullen vollichlich vnd gentzlich an allen abgang den viertailen steuffen vnd andern mazzen zu den si beschiket vnd geo^erdent werdent also, wo man ain viertail oder waz mazze ez dann were auftu^et vmb zwaintzig phenning, daz da daz a^engstel daz ze ainem phenwert gemacht wiert geleich eben volles ze zwaintzig malen eruolle gentzlich an allen abganch daz viertail den stauff oder die mazze, da ez zue geordent ist, vnd daz ouch also andere a^engstel minnere oder mêre igleichs in seinem lauffe gentzlich vnd vngeuo^erlich an abganch vnd an allen valsch geheln volchomchlich denselben viertailn stauffen oder mazzen zu den si geschikchet werdent an alle geuerd, wan also wiert fremden vnd gemainen leuten vnd allen den die vailen wein met oder pyer trinchent vollichlich vnd gentzlich ier rechte mazze yedem mann vmb ainen phenning ain rechtes phenwert an allen valschs, vnd beleibent die leut vnbetrogen von den leitgeben die vo^ermals nach ierm mutwillen geschenchet haben wie si wolten, vnd beschiecht aller mennichlich rechter denn vo^ermals sei geschehen. Ouch sullen wir allenthalben daz vo^ergenant vnser vngelt besetzen mit vnsern amptleuten der wir nu oder hernach dartzue getrewen vnd gelauben, vnd sullen ouch dieselben vnser amptleut alle wochen ains oder zwier ye auf verchert ta^eg zu solichen zeiten so man sich des allerminnist verstet, besehen alle mazze ez sein vierlail steuffe oder angster, vnd sullen die angiezzen vnd versuehen in allen gastheusern tabernen vnd leitheusern oder wo man vailen wein met oder pyer schenchet. Vnd wa si dieselben grozse oder chlaine mazze vngerecht vindent, das sullen si bringen in jeglichem gericht fu^er den herren oder den richter der daselbs gewaltig ist, vnd sol ouch der von yegleicher vngerechter mazze nemen an alle gnade von den in des hous oder gewalt vngerecht mazze funden werdent ze wandel in seinem gericht ain phunt wi^eenner phenning im selber ze nutze von vnsern sundern gnaden als oft vnd als dikche, als dieselben mazze vngerecht funden werdent, vnsern amptleuten darumb ze glauben vnd niemant anderm. Ouch sol niemant chain vaz mit wein mit met noch mit pyer chlain oder gro^ez auftu^en noch schenken denn mit vrlaub vnd wizzen vnserr amptleut die wir darzu^e schikchen. Vnd wie yederman daz viertail den stauff oder die mazze wie si dann genant ist auzrueffet oder auftut, also sol er ouch nach demselben anslag daz vaz darnach als ez hat oder bringet vervngelten vnd den zehenten tail des geltes dauon antwu^erten vnd geben demselben vnserm amptman, den wir dartzue setzen. Wer aber das yemant an vnsrer amptleut wizzen vnd v^erlaub vnuervngelter aufta^et vnd schancht dhain vaz chlains oder gro^ezzes mit wein met oder pyer, oder ob yemant auz ainem vazze mer schenkchen wolte denn des ersten darinne gewesen ist, also waz man vo^er auz dem vazze schancht daz als vil oder mer oben darinne gegozzen wu^erde oder waz geuerde vnd vnrechts yemant darunder treyben wolt, der sol daz vaz mit sampt dem wein dem met oder dem pyer verloren haben gentzlich vnd sol daruber geben ze wandel fumf phunt wienner phenning an alle gnad. Vnd sullen ouch dieselben wandel wein met pyer vnd phenning geuallen vnd werden den herren vnd richtern in der gebiet vnd gerichten sev verschuldet werdent, die ouch darumb gelauben sullen ainualtichlich vnd gentzlich vnsern amptleuten die wir darzu^e setzen also, daz vns doch von solichem verlorem wein met oder pyer vnser vngelt vnd aufsatzt geualle vnd werde richtichlich an allen abganch. Vnd sullen ouch alle herren vnd richter dieselben gro^ezzen wandel vnd ouch die egenanten chlaine wandel von vngerechter mazze wegen als vorbeschayden ist nach weisung vnd sag vnsrer amptleut innemen vnd behalten, in selber ze nutze an alle gnade. Vnd wann daz vorgenant jar nach dem egenanten sand jorgen tag auzget, so sol vns yeglicher herr vnd richter wizzen lazzen bey seinen trewen an allez geuerde, waz dieselben grozze oder chlaine wandel des jars bracht habent, vnd sullen ouch die vo^ergenanten vnser lantherren vnd richter daz egenant vaser vrigelt mit allen sachen furdern vnd vnsern amptleuten dartzu^e geholfen sein mit ganzen trewen vngeua^erlich, als si vns daz verhaizzen habent bei iren trewen, vnd ouch als wir in des gentzlich gelaubt vnd getrawet haben. Wir haben aber vns selber vnd vnsern bru^edern vnd erben auzgenomen vnd vorbehabt alle wandel, die in aller vnserr a^epte prela^eten probsten mannchlo^estern vnd vrowen chlo^estern pharrern oder chapplanen gerichten vnd gebieten geuallen mugen in disen sachen. Wa^ere auch daz dhainer vnserr amptleut die wir vber daz vo^ergenant vnser vngelt setzen chain vnrecht in yemants gericht fuerund wu^erd oder tuend in den egenanten sachen, das sullen vnser lantherren vnd die richter bringen an vns oder an vnsern lantmarschalich in O^esterreich, vnd sullen ouch wir denselben vnsern amptman oder dieselben vnser amptleut darumb pezzern vnd straffen an leib vnd an gu^et nach gelegenhait der schulde die wir mit warhait auf si vinden. Wenn sich ouch in disen sachen verlauffet ain gantzes jar nach dem egenanten sand Jorgen tag der schierist chumt, so sol diser aufsatze (sic) absein in aller vnserr lantherren gerichten vnd gebieten, ez sei danne daz wir mit denselben vnsern lantherren gerichten vnd gebieten vo^er hin vberain chomen vnd zerat werden, daz wir ez lenger halten welten vnd daz ez||
vns baydenthalben nutzlicher ru^ebiger fridlicher vnd richtiger sei denn die munzze, mit solichem vnderschayd, wann ez vns oder nach vns vnsern bru^edern vnd erben misseualle, daz wir danne dauon lazzen vnd vns wider zu vnsrer munzze haben mugen nach den rechten freyhayten vnd gewonhayten als dieselb vnser munzze von alter herchomen ist an allez geuerde. Wer aber daz vns vnsern bru^edern vnd erben vnd ouch vnsern landen vnd leuten die sunderlich zu vns geho^erent diser newer aufsatzt des vo^er geschriben vngeltes baz geuielle vnd vns nutzlicher fridlicher vnd richtiger wu^erde denn die munzze, so wellen wir an derselben munzze stat die weil ez vns fueget halten vnd nemen daz vorgenant vngelt in vnsern vnd ouch in aller vnserr chlo^ester vnd phaffhait gebieten ze O^esterreich als wir das vo^ermals angeuangen haben. Vnd welicher lantherr das mit vns erchennen vnd haben wil, den wellen wir in seinen gepiet vberhaben der egenanten vnserr munzze. Welicher aber daz nicht tu^en wil, auf dem vnd des leuten guetern vnd gerichten wellen wir haben vnser munzze mit allen den freyhaiten rechten vnd gewonhayten als die von alter herchomen ist. Geschiecht ouch daz wir vnd vnser lantherren gemainlichen inner disen nächsten jaresvrist vberain chomen vnd zerat werden daz wier die egenanten vnserr munzze ablazzen gentzlich vnd vns zu dem vorgeschriben vngelt ziehen vnd haben wellen ewichlich, so sullen wir ez enander baydenthalben an der munzze stat zu einer ewichait vnd zu einem rechten machen vnd verschreiben mit aller der ordnung beschaydenhait vnd chraft warten geberden vnd briefen die dartzu^e dhaines weges notdu^erftig sind vnd geho^erent an alle geuerde. Wer aber daz wir des in dem namen als da vo^er gemainlich nicht vberain chomen mo^echten, so sullen vnd mugen wier vns aber halten zu vnserr munzze als vo^ergeschriben stet, vnd sullen ouch dieselben vnserr munzze ze Wienn vnd anderswo die weil daz vngelt weret vnd alle zeit meren slahen vnd halten vmb rechten vnd gewonlichen slaizschatz mit vnsern hausgenozzen als daz no^etdu^erftig ist, durch daz vnser land vnd leut an chlainen phenning nicht gepresten gewinnen. Vnd daruber ze vrchund haben wir vnser insigel gehangen an disen brief, den ouch die edeln vnd erbern vnser lieben getrewen graf Pu^erchart von Maydburch der alt Eberhart von Walse von Lyntze vnser houptman ob der Ens vnd Perchtold von Pergowe vnser lantrichter in Osterreich an stat vnd in namen der andern vnserr lantherren aller gemainlieh in O^esterreich vnd ier selbers mit sampt vns versigelt habent mit iren anhangenden jnsigeln. Daz ouch wir dieselben graf Purcharten (sic) von Maydburch, Eberhart von Walse vnd Perchtold von Pergowe bechennen vnuerschaydenlich fu^er vns vnd fu^er alle ander lantherren ritter vnd chnecht in O^esterreich von ier aller sunderlichem vnd gemainem gescheft vnd haizzen in aller der mazze als vorgeschriben stet an alle geuerde. Ditz geschach in ainem gemainen vnd offenn gesprech mit allen lantherren rittern vnd chnechten ze O^esterich die dartzu^e geho^erten vnd ze rechten zeiten gerueft wu^erden nach ier allem ainhellung vnd gemainem rat. Vnd ward diser brief geben ze Wienn an dem na^echsten phintztag vo^er vnser vrowen tag ze der chundung nach christes gebu^erd tausend dreuhundert jar darnach in dem nevn vnd fumftzkistem jar.

Source Fulltext: OÖUB 7 (Wien 1876), S. 628ff., Nr. 619