ICH Stephan der Erb vnd ich Elspet sein hausuraw wier vergehen vnd tun chunt daz wier mit vnser grunturawen handen der erbern geistleihen vrawen swester Elspeten der Maynn ze den zeiten priorinn in der erbern geistlihen vrawen chloster dacz sand Marien Magdalen var schottentar ze Wienn vnd swester Annen der Jansinn ze den zeiten maisterinn in der erbern geistleihen vrawen chloster datz sand Jacob auf der Huben ze Wienne recht vnd redlihen verchauft haben vnsers rechten chaufguts, daz wier miteinander mit gesampter hant eraribait vnd gechauft haben, zehen ieuchart akchers mit sat mit alle, gelegen an dem Wyennerperg ze näst der herren akcher dacz dem heyligengeyst ze Wyenne, vnd da man von den acht jeuchen die in der Nidernschozz ligent alle iar dient den erbern gêstlihen vrawen datz sand Marien Magdalen achtzig wiener . phening an sand Michels tag ze gruntrecht vnd nicht mer, vnd von den zwain ieucharten di in der Obernschozz ligent den erbern gêstlihen vrawen datz sand Jacob ze Wyenne zehen wienner phenning an sand Michels tag ze gruntrecht vnd auch nicht mer. Di vorgenanten zehen ieuchart akchers haben wir mit sat mit alle recht vnd redlihen verchauft vnd geben vmb fumfczehen phunt wienner phenning der wier gar vnd gêntzlich verricht vnd gewert sein dem erbern mann hern Hawnolten dem Schûchler purger ze Wyenne oder swem er di schafft oder geit, f'ürbas ledichleihen vnd vreyleihen ze haben vnd allen iern frumen da mit ze schaffen. Daz diser chauf furbas also stêt sey vnd vntzebrochen beleib vnd wenn wier selber nicht aigens insigils enhaben, dar vmb so geben wier jn disen brief ze ainem offen vrchund diser sach versigilt mit der egenanten vnserr grunturawn insigiln der erbern gêstlihen vrawn vnd des conuents gemain in dem egenanten chlöster datz sand Marien Magdalen var schottentar ze Wyenn vnd der erbern gêstlihen vrawn swester Ann der Jansinn ze den Zeiten maistrinn datz sand Jacob ze Wyenne vnd mit des erbern mans insigil hern Chu^enrats von Gaarzz purger ze Wyenne, di wir des fleizzivhlich gepeten haben, daz si diser sach zeugen sint mit iren insigiln. Der brief ist geben ze Wyenn nach Christi gepurd drewtzehen hundert iar dar nach in dem newn vnd fumftzigistem iar des nasten mantags nach dem plümostertag,

Source Fulltext: OÖUB 7 (Wien 1876), S. 642f., Nr. 631