Ich Gedraut der Gerichtlerinne von der Newenstat vnd ich Nichlas der Haynusch von O^edenburch ir aidem vnd ich Margret sein hausurow ir tochter vnd ich Jans der Schaitler von Waltherstorf vnd ich Nichlas der Schuster von O^edenburch vnd ich Peter Chunrats sun des Schaitler dem Got genade vnd der egenanten vron Gedrauten vnd Janses des Schaitler eninchel wir vergehen vnd tun chunt, daz wir recht vnd redleich verchauft vnd geben haben vnsers rechten purchrechts daz wir ze purchrecht gehabt haben von dem erbern herren hern Vlreichen von Pergaw vnser mu^el gelegen ze Waltherstorf in dem marcht pei der padstuben vnd allez daz daz zu^e derselben mu^el geho^eret wie so daz genant ist, mit allen den nutzen vnd rechten als wir si in purchrechtes gewer her pracht haben, vmb fu^emftzich phunt wienner phenning der wir gar vnd gaentzleich gewert sein, dem vorgenanten erbern herren hern Vlreichen von Pergaw vnd seinen erben die egenanten mu^el vnd was dar zu gehöret furbas ledichleich vnd vreileich ze haben vnd allen iren frumen damit ze schaffen, und wand der vorgenant Peter noch zu seinen iaren nicht chomen ist, dar vmb so setzen wir vns ich vorgenantew Gedraut die Gerichtlerinne sein an vnd ich Nichlas der Hainusch ir aidem vnd ich Margret sein hausurow vnd ich Jans der Schaitler des egenanten Petreins ên vnd ich Nichlas der Schuester vnd alle vnser erben vnuerschaidenleich fu^er vns vnd für den egenanten Petrein vber die obgenanten mu^el vnd vber alles daz vnd darzu gehöret ze rechten gewern vnd scherm für alle ansprach als purchrechts recht ist vnd des landes recht ze O^esterreich vnd auch als lang, vntz daz der egenant Peter zu seinen rechten iaren chu^emt vnd sich der vorgenanten mu^el vnd was darzu gehöret gar vnd gaentzleich verzeicht vnd aufgeit, als purchrechts recht ist vnd des landez recht ze O^esterreich. Vnd daz diser chawf fürbas also staet vnd vnzerbrochen beleibe vnd wand wir selber nicht aigner insigil haben, darvmb so geben wir hern Vlreichen von Pergaw vnd seinen erben disen brief zu einer ewigen vestnung diser sache versigilten mit der erbern herren insigiln bern Hermanns von Lanndenberg lantmarschalich in O^esterreich vnd hern Perichtolts von Pergaw zu den zeiten hofrichter in O^esterreich vnd mit hern Nichlas insigil dez Vegengasts zu den zeiten purgermaister datz der Newenstat. Der brief ist geben drewtzehen hundert iar darnach in dem newn vnde fu^emftzgisten iar des na^echsten phintztags vor sand Michels tage.

Source Fulltext: OÖUB 7 (Wien 1876), S. 659f., Nr. 650