Ich Vlreich Guetiar purger ze Gemunden vergich vnd tuen chunt, daz ich mit guetem willen vnd wart meiner hausfrawen vrawn Margareten vnd aller vnser erben han geschaft vnd gegeben zu ainem ewigen selgeraet mir vnd allen mein vadern seln meiner lieben hausfrawen saeligen sel vrawn Elspeten vnd aller vnser payder nachchomen seln zu hilf vnd zu trost in den eren der heyligen driualtichait vnd in den eren der heyligen mueter Marie vnd in den eren der gemain aller Gotes heyligen. So schaff ich von erst auf meinem haus daz ich gepawen han mit meinem aygen guet, daz gelegen ist gegen der Altrichterinn haus saeliger vnd zu naest der Eberhartinnhaus ze Gemunden ain phunt phenning wienner mu^encz zu rechtem purchrecht in di chappelln zu naest pey dem spital ze Gemunden vnd da sand Jacob inn rastet, da man Got vnd alle sein heyligen von beleuchten schol mit einem ewigen liecht. Dar nach schaff ich hincz Vnser Vrawn pharrchirchen ze Gemunden in daz liecht auf Liebharts haus ze Gemunden vier vnd zwainczig phenning, vnd schaff auf der Geblinn haus ze naest da pey gelegen auch vier vnd zwainczig phenning, vnd schaff auf dez Gerlhaymer haus an dem obern marcht ze Gemunden gelegen auch sechs vnd sechtzig phenning in daz vorgenant liecht. Dar nach so schaff ich sunderwar auf dez Fuchs haus ze Gemunden zu naehst pey der pruk gelegen daz ich gepawen han mit meinem aygen guet, vnd auf zwain gaerten die ich gechauft han vmb mein aygen phenning di gelegen sint ob dez spitals garten ze Gemunden, ain phunt phenning wienner mu^encz zu rechtem purchrecht den bedu^erftigen in daz spital ze Gemunden mit so^elher peschaydenhait, swer zu denselben zeiten phleger vnd verweser ist dez vorgenanten spitals, derselb pider man schol raychen vnd geben gu^eetleich vnd gern vnd vnuerczogenleichen zu vier zeiten in dern iar zu ainer yesleichen chottemper den vorgenanten siechen vnd du^erftigen sechczig phenning als verr di geraichen mu^ogen, da si ir notdurft mit pezzern vnd da si vnsrer sel mit gedenchen. Waer aber daz getan, daz ein spitalmaister verczug den eegenanten du^erftigen daz geschaeft als vorgeschriben stet, so schu^ellen ez di siechen tragen fu^er den statrichter ze Gemunden vnd fu^er die erbern purger da selben, di schu^ellen dann den spital maister weysen vnd no^eten, daz er in daz vorgenant selgeraet geb vnd raich vnuerczogenleichen. Ich schaff auch mir vnd allen meinen vadern vnd allen meinen nachchomen seln vnd meiner obgenanten hausfrawen vrawn Elspeten vnd saeliger sel, ires vater sel Chuenrats dez Altrichter irer mueter sel saeliger vrawn Gedrauten vnd allen iren vadern vnd nachchomen seln fu^emf schilling phenning wienner mu^encz auf einer wisen, di genant ist di Scheybel wise gelegen pew der Awrach vnd da man von geit zu vorstrecht sechs phenning, zu ainem ewigen jartag mit so^elher peschaydenhait, wer chirchherr ze Gemunden ist oder pharrer daselbs, dem schu^ellen geuallen drey schilling phenning vnd seinen gesellen sechczig phenning. Man schol auch den vorgenanten jartag pegen mit ainer gesungen vigili mit einer gesprochen mess vnd mit ainem selampt gesungen dez naesten tages nach vnser vrawen tag der schidung. Wer aber daz getan daz dazselb selgeraet nicht volpracht wurd als vorgeschriben stet, zu welhen jarn daz geschaech, so schol der vorgenant gelt den du^erftigen geuallen in daz spital zu Gemunden an allez vercziehen dez selben jars. Daz dise sach vnd di vorgenante wandlung also staet vnd vnczebrochen peleib, dar v^eber gib ich der vorgenant Vlreich Guetiar disen prief zu ainem vrchund der warhait geuestent vnd bestaetigt mit meinem anhangundem jnsigel versigelt. Vnd zu ainer pezzern sicherhait mit der erbern gemain stat ze Gemunden anhangundem jnsigel versigelt. Der prief ist gegeben nach Christes gepurd dreuczehen hundert jar darnach in dem newn vnd fu^emfczigistem jar an aller heyligen tag.

Source Fulltext: OÖUB 7 (Wien 1876), S. 666ff., Nr. 657