Ich Vlrich der Anhanger von Choppach mein hausfrow vnd alle vnser erben veriehen offenbar, daz wir die gu^eter vnd gu^elt die wir gehabt haben ze Obern Welmich, die vns vns er herr her Eberhart von Walsse hauptman ob der Ens verlihent het vnd die der Syppekch emaln von im ze lehen hat gehabt, swie die selben gu^eter gehaizzen sint vnd an swen dev gelegen sint, redlich vnd recht ze chauffen haben gegeben alle die recht vnd gewerschaft die wir daran gehabt haben dem erbi^erdigen vnserm gena^edigen herren hern Ortolfen ertzbischof ze Saltzburg vnd legat des stu^els ze Rom vnd seinem gotshaus vmb zway vnd virtzich pfunt wienner pfenning, der wir gaentzlich gewert sein, vnd haben im die selben gu^et aufgegeben mit hern Eberharts hant von Walsse, der die gu^eter gemachet vnd geaygent hat dem obgenanten ertzbischof ze Saltzburg vnd seinem gotshaus mit seinen brif vnd mit vnser pett vnd willen, vnd verzeihen wir vns derselben gu^eter nu^etz vnd gu^elt ga^entzlich fu^er vns vnd alle vnser nachchomen, daz wir fu^erbas nimmermer dhain ansprach darnach haben sullen weder mit recht noch an recht, vnd darv^eber ze vrchunt so geben wir im den brief versigelten mit meinen anhangundem jnsigel. Datum anno domini m°.ccc.Ix°. an samptztag nach ostern.

Source Fulltext: OÖUB 7 (Wien 1876), S. 693, Nr. 686