Ich Wylhalm Otten sun ab dem Perig vnd ich Vlreich sein brueder mein hausfraw vnd alle vnser erben veriehen daz wir schuldig sein vnd gelten sullen vnser frawn gen Ort vnd den cechlaeuten doselben fünf pfunt pazzawer phenning, vnd darvmb haben wir in gesetzt vnser guet ze Portz gelegen in dem Elhenpach vnd da wir in aller jaerleichen davon dienen sullen an vnser frawntag als si geboren wart ein halbs phunt passawer pfenning, vnd welchs jar wir in den dienst versaezzen, so habent vnser frawn zechlaeut von Ort di dann sindt gewalt vns ze pfenten vmb den dinst als ander erber laeut auf iren guten. Wir haben auch vollen gewalt den vorgeschriben satz herwider ze losen alle jaerchleichen ze liechtmess ze rechter losungzeit vmb funf phunt pazzawer pfenning di dann gib vnd gab sint. Darvber ze ainen vrchund geben wir in den brief versigelt mit vnsers getrewen freunts insigel Hainreichs des Stainpechen ze den zeiten richter ze Scherding. Der brief ist geben dreuzehen hundert iar darnach in dem sechzigisten jar an sand Paulstag als er bechert ward.

Source Fulltext: OÖUB 7 (Wien 1876), S. 684f., Nr. 675