ICH Fridreich und Hainreich brueder von Walsse vergehen offenleich und tu^en chunt, daz wier getaylt haben also beschaydenleich, daz mir egenantem Fridreichen von Walsse und mein erben mit rechtem tail ist gevallen di vesst Herttenstain mit alle dew und dar zu^e geho^ert wie so daz genant ist, und die vesst Sumerawe und waz darzu gehort wie so daz genant ist, und waz wir umb di Freynstat haben ez sein zehent wysen ackcher oder haewser in der stat oder auzzerhalb der stat, und die gueter von dem Reykestorfer und der weingarten ze Spicz der von dem Sebekchen herko^emen ist mit alle dew und darzu^e geho^ert, und der zehent ze Rossazze und waz zu dem selben zehent geho^ert, ez sey weyn oder trayd, und waz wir guets umb Wyenne gelegen haben ze Stru^epphing ze Checzleinstorf und den hof ze Hersteten und waz wir ze Nusdorf haben, ez sey an perkchrecht oder an phenninggelt und alz ez unser schaffer ze Wyenne von uns hat inne gehabt wie so daz genant ist ez sey an phenning gu^elt oder traydzehent oder weinzehent, perkchrecht oder pu^erkchrecht ez sei gelegen enhalb der Tuenawe oder hinderhalb der Tuenawe, und alle di gu^eter so von dem von Lyechtenstain hercho^emen sind ze Sybenpru^enne ze Reysenperg oder ze Prukke und ze Gunderstorf, virdhalben emmer perkchrecht und syben schilling phenning gelts, daz mir vorgenantem Fridreichen von Walsse und meinn erben auch mit rechtem tail gevallen ist. Di vo^ergenant vesst Herttenstain mitsampt den gu^eetern umb Weytra gelegen und di vesst Sumeraw^e mit sampt dem gelt ze Pybu^erch gelegen in sand Valtein pharr an den zehent daselbs der mein pru^eder Hainreichen mit rechtem tail gevallen ist, di zwo obgenanten vesst Herttenstain und Sumeraw^e mit alle dew und darzu^e geho^ert, ez sein gericht forst waeld see vlyezzund wazzer vischwayd wismad aekcher in u^erbar ze holcz ze veld und ze do^erff ez sei gestift oder ungestift versuecht oder unversuecht oder wie so daz genant ist, und auch mit sampt den vorgenanten guetern und stu^ekchen di darauf getailt sind und mit alle den guetern di zu den oftgenanten zwain vessten Herttenstain und Sumeraw^e gechauft sind, ez sei geschehen vor unsers liben vater saeligen to^ed oder hernach, ist mier egenantem Fridreichen von Walsse und mein erben gevallen an aim tail, da engegen an dem andern tail ist mier vorgenantem Hainreichen von Walsse und meinn erben recbt und redleich gevallen di vesst O^ert in dem Trawnse gelegen mit alle dew so darzu^e gebo^ert alz wier daru^eber besunder brief haben von unsern liben o^ehaymen von Raw^echenstam und von Winkchel mit dem zehent ze Lo^echchirchen und der hof ze Gastayg und di hueb an der strazz, so emaln darauf getailt ist. Mier ist auch gevallen di halb vesst ze Mu^elbach mit alle dew und darzu^e geho^ert wi so daz genant ist, und waz wir haben umb di stat ze Enns, ez sein aekcher oder haewser oder wie so daz genant ist in der stat oder auzzerhalb der stat, und di gu^eter in dem Ensdo^erf so von dem Wolfstain herchomen sind, und der zehent ze Pybu^erch und ze Winttpa^ezzing gelegen in sand Valtein pharr, und darzu^e daz perkchrecht ze New^enbu^erch mit allen sachen und daz maethaws ze Maetha^ewsen und fu^emf und sybenczk phenning gelts pu^erkchrechtz auf dem hof ze Stolhenperg gelegen pey Maethawsen und waz wier ze unserm tail haben ze Ga^empolting in dem Taenaw^e tal gelegen pei Scho^enhering mit zehenten und mit allen nuczen. Di vo^ergeschriben vesst O^ert und waz darzu^e geho^ert mit alle dew^e und darzu^e gechau^eft ist ez sei geschehen vor unsers liben vater saeligen to^ed oder hernach mit sampt der halben vesst Mulbach und den gu^eetern und stu^ekchen di darauf getailt sind und wie so di genant sind ist mir obgenantem Hainreichen von Walsse und mein erben gevallen an dem andern tayl mit alle dew^e und darzu^e geho^ert, ez sein gericht fo^erst waeld se vlyezzunde wazzer vischwaid wysmad aekcher ze holcz ze veld und ze do^erff, ez sei besu^echt oder unbesu^eecht gestift oder ungestift oder wie so daz genant ist alz hie vo^er geschriben ist, also mit auzgenomer red, waz ich vorgenanter Fridreich von Walsse und mein erben haben verlehents gu^ets daz zu^e den zwain oftgenanten unsern vessten Herttenstain und Sumeraw^e an aim tayl geho^ert, ez sein manlehen oder chirchleben, di sol mein bru^eder Hainreich und sein erben mit sampt uns haben und leihen. Waz ich dann egenanter Hainreich von Walsse und mein erben baben verlehents gu^ets daz zw unser vesst O^ert und zu der halben vesst Mulbach an dem andern tail geho^ert, ez sein manlehen oder chirchlehen, di schol mein bru^eder Fridreich und sein erben mit sampt uns haben und leihen. Wir haben awch nach nicht getailt unserew haewser ze Wyenn und daz haws ze Chremsse und all unser paw^eweingerten, si sein gelegen ze Wyenn oder ze Chrems oder in der Wochaw^e oder wo si gelegen sind, und haben uns auch mit einander verricht umb alle varunde hab an daz silbergeschierr alain, daz wir nach mit einandertaylen schullen. Daz der tayl und di wandlu^eng fu^erbaz also staet gancz und unczebrochen beleib, daru^eber geb wier ich oftgenanter Fridreich und Hainreich bru^eder von Walsse disen brieff ze ainem warn urchund und ze ainer ewigen vestigung diser sach versigelten mit unser payder anhangunden insigeln und mit unsers liben vettern hern Eberharts von Walsse von Lincz hauptman ob der Enns anhangundem insigel und mit hern Stephans insigel pharrer ze Su^endelbu^erch und mit unser dyener insigeln hern Hansen von Saew^esenek und hern Chu^enrats von Awrach und mit hern Fridreichs dez Chyenberger und Chu^enczeins von Meylesto^erf insigel, di all diser sache zew^egen sind mit iern anbangunden insigeln. Der brief ist geben nach Christi puerd drewczehen hundert jar darnach in dem ains und sechczkisten jar an sand Stephans tag alz er fu^enden ward.

Source Fulltext: OÖUB 8 (Wien 1883), S. 41ff., Nr. 39