ICH Hans von Seusenek ich Otakcher der Wolfstain ich Chuntz von Meileinstorf und ich Hans Mu^erli wir vergehen mit sampt allen unsern erben offenlich mit dem brief, daz wir unverschaidenlichen gelten sullen dem edeln herren hern Fridrich von Waltse von Ens und allen sein erben zwai hundert phunt alter wienner phenning, der wir sew an allez vertziechen richten und weren sullen auf sand Michahelis tag der nu schirist chumt. Tet wir des nicht, habent si vollen gewalt uns ze vordern und ze manen mit ir briefen oder gewizzen potschaft; und nach derselben monung so sullen wir in vorgenant jeder man ein erbern chnecht mit zwain pheristen inlegen ze laisten gen Ens in die stat in ein erber offen gasthaws da in hin getzaigt wiert, und sullen diselben da laisten angever alz laistens und innligens recht ist und nimmer auzchomen oder si werden e von uns und von unsern eriben des obgesehriben geltes gantz und gar gericht und gewert. Wurd aber in di laistung von uns vertzogen, von wigetann sachen daz chomen mocht swaz si des schaden nemen, denselben schaden sullen wir in abtu^en und widercheren zesampt dem haubtgu^et und sullen si daz haben dacz uns und dacz unsern trewen und dartzu^o auf aller unser hab swo wir di haben in Osterreich und ob der Ens. Daruber ze eim waren urchund so geben wir in vorgenent disen offenn brief mit unsern anhangunden insigeln, der geben ist von Christi gepurd dreutzehen hundert jar darnach in dem ains und sechtzigistem jar des eritags an sand Laurentzen tag.

Source Fulltext: OÖUB 8 (Wien 1883), S. 43f., Nr. 40