ICH Philipp des Tungizzinger aydem purger ze Lintz und ich Lobey sein hawsfrawe vergehen offenbar an dem prief und tun chunt, daz wier recht und redleich gesatzt haben dem gotzshaus datz sangd Gallneunchirichen unser hoff der genant ist der Stettenhof, der in derselben pharr gelegen ist der unser recht lehen gewesen ist von dem gotzshaus ze Pazzawe, mit allen den eren rechten und nutzen und darzue geho^ert umb zway hundert phunt phenning alter wienner munzze der wier von dem egenanten gotzshaws gantz und gar gericht und gewert sein, und haben auch dem egenanten gotzshaus dem pharrer und auch den pharrleuten daselber den egenanten satz und den hof bestett mit unsers genedigen herren hant pischalf Go^etfrides zder selben zeit ze Pazzawe, der in von sein genaden durich Got di aygenschaft darzue gegeben hat ze unser vrown messe, und schullen und mugen auch seu allen ieren frum damit schaffen, daz wier seu noch all unser erben daran nindert ierren noch engen schullen an chainer stat, wier schullen auch des obgenanten satzes ier gewer sein, wo des dem obgenanten gotzshaus no^et oder du^erft geschiecht... Und wer daz jemant herfu^er chem der pezzer erb darzue wolt sein, der schol dem obgenanten gotzshaus geben zway hundert phunt phenning an allen chrieg. Daz dem obgenanten gotzshaus dem pharrer und auch den pharrleuten di red von uns und von allen unsern erben also stet und unverchert beleibe, daruber so gib ich in den prief besigelten mit meinem anhangunden insigel. Der red sind getzeug mein genediger herr her Hans von Trawn zder zeit haubtman in der Riedmarch und Fridreich der Valich zder zeit purgraf datz Riedek und Walchuen der Celler und Fridreich der Ungelter mein pruder purger zder zeit ze Lintzz all vier mit ier anhangunden insigeln in an schaden. Der prief ist geben do von Christi gepu^erd ergangen waren dreutzehen hundert jar darnach in dem ayns und sechtzkisten jar an gotzsleichnams tag.

Source Fulltext: OÖUB 8 (Wien 1883), S. 22f., Nr. 25