Wir Ru^odolff der vierd von Gots gnaden ertzhertzog ze O^esterreich ze Steyr und ze Kernden herre ze Chrayn auf der Wynndischen Marich und ze Porttenowe grafe ze Habspurg ze Phyrtt und ze Kyburg, marichgraf ze Purgowe und lantgraf in Elsazze des durchlewchtigen fursten weilent hertzog Albrechts von O^esterreich erstgeborner sun tu^en kund und bechennen allen kristen gelaubigen die jetzunt sind oder hienach choment ewichlichen, daz wir betrachtet und mit rechter erkantnusse angesehen haben, daz in diser welt nichts beleibents noch stetes dinges ist und daz einem jeglichem menschen in der ewichait darnach gelonet wirt als er hie mit gu^ettet verdienet und erworben hat, und wan auch in allen sachen grozzen und chlainen unsers Herren und seiner heiligen hilffe anzeru^effen und ze erwerben ist, ane der hilffe sich nichts in diser welt enden noch furganch gehaben mag, haben wir ze der zeit do wir chriegten mit dem erwirdigen hern Ludweigen patriarchen von Aglay und do wir chomen gen Ens an unserm gevertt von dem kayser von Prag und ziehen wolten hinin gen Fryawl, den heiligen herren sand Georigen under andern heiligen von der besundern genad andacht und begierd wegen die wir ye zu^o im gehabt haben und ymmer haben wellen, und ouch durch seiner grozzen miltichait willen die er uns offt und dikch enzaigt hat, vestichlich in unser hertze genomen und verhiezzen im innerklichen. were daz uns gelungen und gelucklichen gieng in dem egenanten chrieg wider den egenanten patriarchen von Aglay sein helffer und gunner, daz wir im dann ein ewig messe stifften und wydmen wolten in sein chapellen genant sant Georgenchapellen, die gelegen ist daselbs ze Ens vor der stat. Nu ist uns von Gots gnaden und mit desselben sant Jo^erigen hilffe in dem selben krieg wol gelungen also, daz wir denselben patriarchen von Aglay gen Wienne pracht haben und haben taiding an im nach allem unserm willen der uns wol genu^eget. Und darumb seind es uns als geluklichen gegangen ist in denselben sachen, haben wir dem egenanten sand Georigen im ze lob und ze eren und uns und allen unsern vordern und nachkomen ze hilff und ze trost an sele und an leib ein ewig messe in sand Georigen Chapellen vor der stat ze Ens di man teglich da haben sol gestifft und gewidmet mit sechtzehen phunt wienner phenning geltes, die man einem jeglichen chapplan swer ye ze den zeiten derselben messe verweser und chapplan ist, von unsrer mautt ze Ens alle jar ze jeglicher quatember vier phunt phenning unvertzogenlichen und ane alle irrunge raichen und geben sol. Davon gebieten wir ernstlichen unserm mautter daselbs ze Ens swer ye ze den zeiten da ist er sei gegenwurtig oder kunftig und wellen, daz er von der egenanten unsrer mautt dem vorgenanten chapplan der obgenanten unsrer ewigen messe in sant Georigen chapellen sechtzehen phunt wienner phenning alle jar unverzogenlichen raihe und gebe ze vier zeiten in dem jar als da vorgeschriben stet. Ouch sullen wir unser bru^eder unser aller erben und nachkomen dieselben messe ewichlichen leihen oder swem wir vorgenanter hertzog Ru^odolff die geben ze leihen. Und des ze einer ewigen bestetigunge und sicherhait geben wir offtgenanter hertzog Ru^odolff disen brief versigelten und mit unserm grozzen furstlichen anhangunden insigel. Hiebey waren und sint diser sache getzewgen die erwirdigen her Ludweig patriarch ze Aglay her Johans byschof ze Olmuntz her Go^etfrid byschof ze Pazzow her Johans bischof ze Gurk unser lieber kantzler, her Friderich Albrecht und Leupolt der obgenanten lande mitsampt uns hertzogen und herren unser lieb bru^eder, her Johans marichgraf ze Merhern her Albrecht hertzog ze Sachssen und Meinhart graf ze Go^ertz und phallentzgraf ze Kernden und der edel graf Ulreich von Schownberg unser lieb o^eheim und unser lieb getrewn Stephan von Meichssow obrister marschalch Alber von Pu^ochhaim obrister truchsetz und houbtmann in Steyr Peter von Eberstorf obrister chamrer Haideureich von Meichssow obrister schench Wilhalm von Chrewspach obrister jegermaister in O^esterreich Leutolt von Stadek unser lantmarschalich in Osterreich, Eberhart von Walsse ob der Steyrmarich graf Yban von Pernstain Hainreich von Hakkenberg Chadolt von Ekchartsowe der eltter Jans von Zelkking Ott von Celkking von Scho^enekk sein vetter Hainreich von Rappach unser hofmaister Jans von Lozperg unser Chamermaister Wilhalm der schench von Liebenberg unser speismaister und ander erber lewt genuge. Der brief ist geben ze Wienne nach Kristes geburt tausent drew hundert jar und darnach in dem eyn und sechtzigistem jare an dem heiligen abent ze weychennachten, unsers alters in dem drew und zwaintzigistem und unsers gewalts in dem vierden jare.||
+ Wir der vorgenant herzog Ruodolf sterken disen prief mit dirr underschrift unser selbs hant. +

Source Fulltext: OÖUB 8 (Wien 1883), S. 52ff., Nr. 51