Ich Nicla der Fluschart ich Margret sein hawsvraw . . . vergehen mit dem prief, daz wier ze chawffen haben geben dem erbern herren hern Dietreichen von Losenstain und allen sein erben unsern hof der genant ist ze Hainpuech, und die mull daselbs gelegen in Neunchiricher pfarr und unser lehen daz gelegen ist an der Leiten in Hofchiricher pfarr, daz alles lehen ist gewesen von den Flachnekern, mit allen den ern und nuczen, und darzue geho^ert mit allen den rechten und nuczen und wier izz und unser vorvodern inngehabt haben. Daz in von uns di red also stet und unverchert beleib daruber so gib ich obgenanter Nicla der Fluschart und mein hausvrawe und alle unser erben in den offen prief ze einem sichtigen warn urchund versigelten mit meinem anhangunden insigel, und ze einer pezzern sicherhait und gezeugnu^ezz mit meins ochayms Ludweigs von Grueb anhangunden insigel und mit dez erbern mannes hern Erhartes von Spilberch anhangunden insigel, di ich darumb gepeten han daz si der sach damit geczeug sind in payden an schaden. Und daz ist geschehen do man zalt von Christi gepu^erd dreuzehen hundert jar darnach in dem zwain und sechczkisten jar dez montags in der ganczen vastwochen.

Source Fulltext: OÖUB 8 (Wien 1883), S. 65, Nr. 62