Wir Ru^odolff der vierd von Gotes gnaden erczherczog ze O^esterreich ze Steyr und ze Kernden herre ze Chrayn, auf der Windischen Marich und ze Porttnaw graf ze Habspurch ze Phirt und ze Kyburch marichgraf ze Purgow und lantgraf in Elsazzen fu^er uns die hochgeborn fu^ersten Fridereichen Albrechten und Leuppolden unser lieb bru^eder herczogen und herren mitsampt uns der egenanten lande und herschefft der aller als der eltist under in wir vollen und ganczen gewalt haben, verjeben und tu^on chunt offenleich mit disem brief allen den die in sehent lesent oder ho^erent lesen, daz der erber und geistleich probst Jans zu dem Slegel des ordens von Premonstrat in Pazzower bystu^om unser lieber anda^echtiger caplan fu^er uns bracht ein hantfest in latein geschriben, die unser lieber herre und vetter kunig Fridrich selig von Rom dem goczhaus daselbes zu dem Slegel geben hat und daran begriffen ist, wie er mit willen und gunst aller seiner bru^ederr unsrer seligen vordern den Got gnad solich freyung und gnad getan und geben hat ewikleich . . dem probst und den bru^edern gemainlich des klosters zu dem Slegel, daz si ir schaffer oder poten an ir stat all jar die Tu^enaw auf zu^o ir notdurfft fu^eren sullen und mugen fu^emfczehen fu^eder weins freileich und ledigleich an mautt und an zol und an all ander irrung, und bat uns daz wir im seinen bru^edern und irn nachkomen in dem egenanten goczhaus dieselb freyung geru^ochten bestetigen und etwas gnaden darczu^o ze tu^on derwart, daz si dest pas got gedienen mugen und umb unser selbes unsrer herczoginn und aller unsrer geswistreid geluk und hail an sel und an leibe dester fleizzichleicher pitten sullen, haben wir in und irm goczhaus lautterleich durch Got durch unsrer vordern unsrer erben und nachkomen selen hail willen die obgenant freyung die in der egenant unser lieber herre und vetter kunig Friderich von Rom um fumfczehen fuder weins getan hat als da vor geschriben stet, bestetigt und vernewet, bestetigen und vernewen mit disem brief und haben in und irm goczhaus von besundern gnaden darczu^o gegeben und geben ouch wizzentlich mit disem brief ewige freyung noch umb zehen fu^oder weins also, daz der summe wirt fu^emf und zwainczig fu^oder die si furbas alle jar die Tu^onaw auf freyleich und ledikleich an zol an mautt und an all ander irrung ewikleich fur fu^eren sullen zu irr notdurfft. Darumb gebieten wir ernstlich allen unsern gegeuwu^ertigen und kunftigen amptleuten phlegern richtern zollnern und mauttern, daz si daz vorgenant goczhaus bey denselben freyungen und gnaden beleiben lazzen vo^ellikleich und si dabey halten und schirmen ewikleich. Diser sach sind geczeugen die ersamen unser lieben andechtigen Albrecht tu^omprobst ze Pazzow abt Hainrich von Engelcell die edeln graf Ott und graf Ru^odolff von Ortenburch bru^eder graf U^elrich und graf Hainrich von Schownbarg ouch bru^eder unser lieb o^eheim unser lieben getrewen Eberhart von Walsse von Lyncz Eberhart von Chappell Jans von Trawn houptman ob der Ens Ott von Zelking von Scho^enenck Hainrich von Ratpach unser hofmaister und ander erber leut genu^og. Daruber geben wir disen brief besigelten mit unserm grozzem furstlichem insigel, der geben ist ze Pazzow an sand Panthaleous tag nach Christes gepurd dreuczehen hundert jar darnach in dem zway und sechczigistem jar unsers alters in dem drew und zwainczigistem und unsers gewaltes in dem fumften jar.||
+ Wir der vorgenant herzog Ruodolf sterken disen prief mit dirr underschrift unser selbs hant. +

Source Fulltext: OÖUB 8 (Wien 1883), S. 92f., Nr. 91