Ich Hans der Tobelhaimer und Heinreich mein sun vergehen, daz uns der erber herr abt Albrecht ze Aspach und der convent daselbst aller habent geben ir hu^eb ze Ortt mit allen ern und nu^etzen di darzu^e geho^erent und davon bechomen mu^egen zu^e einem rehten leibding unsern zwain leiben also mit der beschaiden, daz wir in all jar an sandMerteins tag da von schu^ellen geben newn schilling wienner phenning di dann gib und geb sint. Welihes jars wir dez niht ta^eten so habent si vollen gewalt auf di obgenanten hu^eb ze stiften wen si wellent, und schu^ellen wir und all unser erben si daran niht irren noch hindern mit chainerlay sachen, und waz wir mit in darumb und umb all pu^entl di vor oder nach an dem brief geschriben sint wolten chriegen oder rehten, daz wer mit geistleichem oder mit weltleichem rehten, daz schu^ellen si alles behabt haben und wir verlorn. Und wenn ich vorgenanter Hans Tobelhaimer und Heinreich mein sun nimmer sein daz Got lang niht geb, so ist in und irem gotzhaws di vorgenant hu^eb ledig worden gantz und gar von uns und von allen unsern erben, und schol all unser afterchunft nimmer mer chain ansprach darnach gehaben noch gewinnen. Daz daz alles stet und unzerbrochen beleib daru^eber zu^e einer urchu^end gib ich vorgenanter Hans Tobelhaimer in den brief versigelten mit meinem und mit meins vetern Chunrad dez Tobelhaimer anhangenden insigeln, wan ich vorgenanter Heinreich dez oftgenanten Hansen Tobelhaimer sun ze diser zeit niht aigens insigels han so verpintt ich mich mit meinen trewn under den insigeln di an dem brief hangent alles daz stet ze haben und ze volfu^ern daz an dem brief geschriben ist. Daz geschach da man zalt von Christes gepurt drewtzehen hundert jar und dar nach in dem zwai und sechtzigstem jar an dem nehsten ffreytag vor dem auffertag.

Source Fulltext: OÖUB 8 (Wien 1883), S. 76f., Nr. 75