Ich Fridreich der Greiner und Wernhart Saumer und Nigglaw Griez und Mertel Tobelgruber verjehen mit dem brief, daz wir und unser erben von unsern genedigen vrawen ze Pazzaw haben ain holtz haizt an dem Mülperg an dem Hart und leit in Veldchircher pharr von dem stain an dem Mülperg uncz an Stophels Virgen vergen march von Lanzhag, und von derselben aych uncz an des Scho^enrutzer march in den graben und an die lantstraz zu der pu^ochen und wider an des Verigen march, und haben daz ze rechtem erbrecht wir und unser erben alz erbrecht recht hat, und ligent diu ellu ze Urvar und sullen ellu jar jerchlichen davon dienen allweg an sant Jeorientag fumfthalben Schilling phenning alter wienner phenning und dez diensts auf jedleich gut besunder, auf di driu gut vir und drizzig phenning und auf daz vierd gut drei und drezzig phenning; und wer daz in der vorgenant dienst an sand Jeorientag nicht geraicht wurd alz vorgeschriben stet, so haut si oder ir amptlawt vollen gewalt und mit unserm gutleichen willen uns darum phenden und no^eten auf den vier gu^eten und tunt daran wider uns nit noch wider unser frewnt noch lanthgeriht noch wider nieman. Si sullen auch dez vorgenanten holtz unser und unser erben reht gewern sein. Wer auch daz daz vorgenant holcz geraitt wurd und ainer auz seinem tail achcher machet oder vihwaid oder wie im geschicht, dannoch sullen unser vorgenant vrawen iren dienst haben von dem vorgenanten holtz alz vorgeschriben stet und unczebrochen belip. darum gib ich vorgenanter Friedreich Greiner in den brief versigelt mit meinem anhangundem insigel daz daran hanget und auch nit verrer dann fur min gut besunder, und darunder ich und min erben uns pinden mit unsern trewen alles war und stet ze halten daz vorgeschriben stet. so pind ich mich vorgenanter Wernhart Saumer under Trentztins des Walhs insigel ze den zeiten purgraf ze Vraudenstain auch mit meinen trewen alles war und stet ze halten daz vor geschriben stet im an schaden nur diser sach ain ziuchnuz. so pinden wir uns ich Nigglaw Gries und ich Mertt Tobetgruber mit unsern erben under Chunratz von Wessenwerch insigel der ze den zeiten purgraf und lantrichter ist gewesen ze Wessenwerch daz auch daran hanget diser sach ze ainer ziuchnuzz im selb an schaden, und darunder wir uns pinden mit unserm triwen alles war und stet ze halten daz vorgeschriben stet und auch nit verer dann fur unser zway gut besunder. Do daz geschah do zalt man von Christes gepurd drutzehen hundert jar und in dem zwai und sechzigestem jar ze weyhenaht in den viren.

Source Fulltext: OÖUB 8 (Wien 1883), S. 119f., Nr. 114