Wir Ulreich vnd Hainreich gepruder grafen von Schawenberch verjehen, das die erbern und gaistleichen lewt her Wilhalm der abbt und der convent des gotzhaws ze Osterhoven bey uns gewesen sind und clagten uns das sy ir brief die sy vor alter zeit von unsern vordern umb ir freyung an unser mautt ze Aschach heten verlorn habent, und als sy ir wein und holcz und allerlay mit irer abschrifft ane urchunde an unsrer mautt verfurt habent das uns doch alles vervallen war, paten sy uns mit ganzen vleiss und ernst das wir in durch Got ain freyung geruehten zugeben dorumb sy fur unsser vorvodern und unser selen hail und säld willen mit irr andacht ewigleich piten wolden, wan wir ain gotliche sache und gute werich die unsern vordern untz an uns begangen habent nicht ahnenden sunder mit gantzer begirde meren und furdern wellen in albeg, haben wir den obgenanten abbt seinem convent und iren nachkomen als von newen sachen und von sundern gnaden geben und erlaubt, das sy jerlich ir wein getrayt und was in ze Osterich auf weinpau wachset wider wasser, und zimberholtz an flozzen und was und allerlay wez sy zu iren hofen und irr arbait von irs closters wegen bedurffent hinaw ane mautt und ane alle irrung furen sullen und mugen also, das unser mawtter nihtz den von dem vertiger das gemain recht von des schiffes podem und von den rudern auf den flozzen vordern und nemen sol und wellen auch ernstlich, das sy alle unser amptlewt bey uns und unsern nachkomen bey der vorgenanten freyung und genad ane alle irrung ewiglich beleiben lassen. des geben wir in zu urchunde disen brief versigelten mit unsern anhengenten insigeln, das geben ist ze Schawenberg an freytag nach der vasenacht nach Christs gepurde drewzehnhundert jar darnach in dem drey und sechzigisten jar.

Source Fulltext: OÖUB 8 (Wien 1883), S. 124f., Nr. 119