ICH Fridreich und ich Salman prueder die Englpoltzdorfer, wier verjehen, daz wier versacht haben ze unsere vronmess ze Gallennewnchirichen unser rechtz erb, daz gelegen ist in dem Purchveld ze Gallennewnchirichen daz da dient ain jar an ain helbling viertzig wienner phenning und daz ander jar an ain wienner viertzig phenning wiener munz, dem erbern gaistleichen herren nern Stephan techent und pharrer ze sand Gallennewnchirchen und auch den tzechleiten daselbst um ain phunt wienner phenning mit allen den rechten und nutzen alz wiers manig jar herpracht haben, also beschaidenleich, daz wier den vorgenanten dienst alle jar ja^erchleich losen mugen acht tag vor unser vrawn tag als si paren ist, und acht tag hinnach der da chumt ober (sic) ein jar umb daz obgenant gelt. Und daz daz stet und untzeprochen pleib, daruber geb wier in den offen prief versigelt mit unsern anhangunden igsigeln (sic) und mit des erbern mans igsigel Walchueus des Tzeller. Der brief ist geben nach Christz gepuerd drewtzehen hundert jar und darnach im drew und sechtzigisten an sand Polten tag.

Source Fulltext: OÖUB 8 (Wien 1883), S. 152, Nr. 146