Wir Ru^odolff von Gots gnaden herczog ze O^esterreich ze Steyr und ze Kernden graf ze Tyrol etc. tu^on kunt, als Hertneid der Mecz und Margaret sein hawsfrawe komen fu^er unser getrewen Niklan den Scheken unsern phleger ze Steyr und gaben im an unserr stat auf ein hu^ob gelegen in dem Enstorf dacz Ens und ein hofstat daselbs die von uns ze lehen sind und baten, daz er die lihe von unsern wegen unserm getrewen Chu^onraten dem Gelwaicz unserm purger ze Wels und Kathrein seiner hawsfrowen die si von in kauft hieten das ouch derselb Schek getan bat. Also haben wir dieselben lehenschaft bestetigt und bestetten ouch dem egenanten Chu^onraten von Gelwaicz Kathrein seiner hawsfrowen und irn erben mit der beschaidenbait, daz sie die obgenanten hu^oben und hofstat fu^erbas von uns innhaben und niezzen su^ellen mit allem dem so darzu^o geho^ert als lehens und landes recht ist, und su^ollen si uns damit getrew und gewertig sein als lehensman irn herren pilleich tu^on sullen. Mit urkunt dicz briefs. Geben ze Wels an sand Johans tag ze weychnachten nach Krists geburd drewzehenhundert jar und darnach in dem vier und sechczigistem jare.||
+ Hoc est verum. +||
Scheko.

Source Fulltext: OÖUB 8 (Wien 1883), S. 160f., Nr. 156