Ich Hainreich von Rinthaim (Reuthaim?) und mein hawsfraw^e Katrey und all mein eriben wier verjehen offenlich mit dem prief, daz wier mit. vogtz hant und mit aller staet gesatzt haben unser gu^et ze Rinthaim (Reuthaim ?) daz recht aigen ist von dem edeln hochgeporen fu^ersten hertzog Ru^edolf von Osterreich und geho^ert in dy vogtay ze Wels Chu^enraten von Ru^ezzhaim und seiner hawsfrau^en Margaretn und allen iren eriben auz unser nu^etz und gewer in dy i^er mit allen den nu^etzen und darzu^e geho^ernt ze holtzz und ze veld versu^echt und unversu^echt umb acht pfu^ent phenning alter wienner mu^enzze, der wir gar und gantz von in verricht und gewert sein, da wir in von dienen schullen all jar jerleich ain phu^ent alter wienner phenning an unser vrawn tag zu^e der dinst zeit, wer awer daz wir in den dinst nicht geben zu^e dem selben tag, so habent sew vollen gewalt den dinst ze slachen mit unserm guten willen, und wer daz wir in han den dinst ze wil auf den satzz slachen wolten, so schol daz gu^et ir kauff sein. wir haben auch vollen gewalt ze lassen all jar jerleich zu^e der lichtmesse vo^er acht tag und hinnach acht tag umb dy obgenanten phening, und ob icht dinst darauf geslagen wer, wir sein auch dez satzz ir gewer wo in dez no^et und durift geschiecht al so der vogtay recht ist ze Wels; waz in daran ab ging daz schullen sew haben auf aller unser hab dy wir haben versu^echt und unversucht. Daz in dew red staet und unverchert beleib daruber ze einem wa^ern urchu^ende geben wir in den offen prief versygelten mit dez erbern manz anhangunden insygel Gotfridz dez Aboldinger im an schaden der zten zeyten onser gewaltiger vogt ze Wels gewessen ist und mit dez hant der satzz geschehen ist. Der prief ist geben nach Christes gepu^erd uber drewzehen hundert jar darnach in dem vier und sechtzkisten jar dez phintztagz vor dem pa^elm tag.

Source Fulltext: OÖUB 8 (Wien 1883), S. 168f., Nr. 164