Ich Stephan von Harach und all mein erben verjehen, daz wir versatztt haben di fu^emf gu^et gelegen ze Irharo^ed in sand Linharder pfarr die unser vreis aygen sind, mit sampt dem zehent grozzem und chlainem den wir dorauf haben auf allen gu^etern gelich halben zehent grozzen und chlainen. Die obgenanten gu^eter ze Irharo^ed alle mit samptt dem zehent hab wir versatztt mit alle dew und dar zu^e geho^ert dem erbergen mann Hainreichen dem Schreiber zder zeit schaffer zder Vreinstat seiner hawsvrawn Dorothen und allen iren erben fu^er virtzk pfunt pfenning winner mu^enzz der wir ga^entzlich gewert sein. Wir haben in auch die obgenanten guter alle ze Irharo^ed mit sampt den zehent daselbs geantbu^ertt, daz si die niezzen und inn haben schu^ellen an allen abslag alz ander ir aygenhaft gu^et. Wir haben auch vollen gewalt die obgenanten gu^eter von in ze lo^esen in dem gegenbu^ertigen jar an sand Michahels tag der schirist chu^emt umb die obgenanten viertzk pfunt pfenning. War awer daz wir an dem obgenanten tag von in niht enlo^estten, so schu^ellen die obgenanten gu^eter alle ze Irharo^ed mit sampt dem zehent daselhs ir chauftz gu^et sein und schu^ellen si damit schaffen allen iren frum. Wir schu^ellen auch der obgenanten gueter aller ze Irharo^ed ir gewer sein, tet wir dez nicht, wittann schaden si dez namen hintz ju^eden oder hintz christen mit nachraisen mit potscheften, den selben schaden schull wir in ga^entzlich abtu^en und schu^ellen si daz haben datz unsern trewn und darzu auf aller unser hab, und schullen unz dorauf pfenden an atz reht unz und di unsern dorumb auf haben wo si unz an cho^ement in steten oder auf panma^erchten als lang, untz si alles ires schadens ga^entzlich do von becho^ement, und schullen unser dhaines veintschaft dorumb niht dulden noch haben. Daz verhaizz wir in mit unsern trewen an aydes stat. Und wer den gegenbu^ertigen brif mit ir gu^etleihem willen inn hat, der sol alle die reht an den obgenanten gu^etern und gen unz haben atz si selb mit dem brief an den gu^etern und gen unz habent. Daz in die red also sta^et beleib, doruber gib ich obgenanter Stephan von Harach in disen offen brief versigelt mit meinem anhangunden insigel und mit dez edeln erbergen herren hern Jansen von Traw^en zder zeit haubtman zder Vreinstadt und mit meiner liben vreunt Chraften von Harach und Jann von Lozperch anhangunden insigeln. und auch mit dez obgenanten Chraften und Jann von Lozperch gunst und willen die handlung geschehen ist. Der brif ist geben nach Christes gepu^ertt drewtzehen hundert jar und darnach in dem vier und sechtzgistem jar ze ostern.

Source Fulltext: OÖUB 8 (Wien 1883), S. 169f., Nr. 165