Ich Eberhart von Chappelln hawptman ze den zeiten dacz Ens und vrow Jeuta mein wirtin hern Mixten tochter von Pottenstain verjechen, das wir geben haben das gu^et auf der O^ede gelegen in Perchircher pfarr fur vreys aigen dem goczhaws der chappelln dacz Mitterberg und swer chapplan da ist dem die chappelln verlichen wirt also, das das vorgenant gu^et wer darauf siczt allew jar dienn schol funfczig pfund leinsat o^els an sant Merteins tag ze ainen ewigen liecht, das unser fraw und die heiligen und das goczhaws alle nacht des nachts davon beleucht werd uncz an den jungsten tag. Darzu^e sol das vorgenant gu^et auch jerglich dien dem selben goczhaws oder wer ze der zeit chapplan da ist zwainczig meczen habern gemessens an sant Gilien tag und sechs und dreissig phenning an sant Georien tag fur chlainen dienst, und swaz dem vorgenanten goczhaws oder wer ze der zeit chapplan da ist an dem vorgeschriben gu^et abget mit recht, das sol ich vorgenanter Eberhart von Chappelln oder mein erben in auzrichten an allen iren schaden. Ta^et wir des nicht, dasselb schullent sew haben auf aller der hab die wir haben in dem land in O^esterreich wir sein lebendig oder tode. Es sol auch wer die vest ze Mitterberg inhat des vorgenanten gutz trewer vogt sein an alles geva^er. und das die rede also sta^et und unzerprochen beleib, daruber so gib ich vorgenanter Eberhart von Chappelln den brief versigelt mit meim anhangundem insigel, und des sint zeug die erbern herren mein lieben o^echaim her Eberhart von Walsse hauptman ze der zeit ob der Ens und her Otto von Volchendorf mit iren anhangunden insigel. Der brief ist geben des jares do man zalt von Gotes gepurt drewczechen hundert jar darnach in dem vier und sechczigosten jar an unser frawen abent zer liechtmez.

Source Fulltext: OÖUB 8 (Wien 1883), S. 164f., Nr. 160