Wier prueder Seyfrid zu den zeiten abbt und allew sammung in dem chlo^ester dacz Reun wier verjehen, daz wir uns verpunten haben dem erhern edeln herren hern Eberharten von Waltsse saeligen und seinen vo^edern ainn jartag ze begen des nesten sampstages vor sand Larentzen tag all jar mit aller wirdichait und andacht nach unsers ordens gewonhait in aller der weis als wir unsers stifter jartag begen, mit vigili und mit aller gaistleichen arbait als ee gewonleich gewesen ist in unserm chlo^ester, darzue mit vier und tzwaintzikch messen also, daz yeder prister in der messe ein besu^ender collecten sprechen schol umb des vorgenanten hern Eberhartes und seiner vo^erdern seel zu^e hilf und ze tro^est, auch welhew messe an dem tag versaumpt wirt daz die vier und tzwainczikch messe nicht gar volpracht wurden, die schullen inner acht tagen nach dem jartag mit gueter gewizzen an underlazz genczleich volpracht werden und gesprochen daz der chainer versaumpt beleib. Auch lob wier daz an dem vorgeschriben jartag aller unser samnung ein erber almu^eesen von dem chlo^ester geben werd, yedem mann uber sein phruent ein mazz guetes weins ain richt gueter visch und ain semel nach unsers chlo^esters gewonhait in den worten, daz yeder man zu der egeschriben arbait dest williger und anda^echtiger sei, und hab wir daz ainvoltleichen getan mit gueter gewizzen durch Got und auch umb die genad und umb die trew die der vorgenant her Eberhart zu uns und zu unserm gotzhaws gehabt hat, und hat zu unserm chlo^ester geschaft daz haws daz er und sein vo^erdern datz Pruk in der stat pei der Mwer gelegen in Steyer gehabt habent mit allew dew und zu dem haws geho^ert hat und geho^eren schol mit ekchern und mit wisen in allen den rechten als her Eberhart gehabt hat zu der zeit, du (sic) er sein gescheft tet und auch der gescha^eft prief sait den er uber allew sein gescheit hinder im lazzen hat. Ob awer wir oder unser nachchomen an dem vorgeschoben gotzdienst und almuesen saumig wern, daz agotwil (sic), nicht geschehen schol und den nicht volpraechten als wir uns verpunten haben, so schol sich der nest erbe hern Eberhartes des vorgenanten haws mit allen rechten unterwinten an nutz und als lang inne haben untzen daz wier oder unser nachchomen allez daz volfuern daz vor versaumpt ist, und wann daz geschicht so schol uns daz haws herwider geantwurt werden mit allen den nu^etzen und rechten als ez uns vor ingeantwurt und geschaffen ist an allen chrieg. Daz daz staet und untzeprochen beleib, daruber geb wir disen offen prief ze urchunt der warhait, der versigelt ist mit unser vorgenantz abbt Seyfritz und mit unsrer samnung des chlo^esters dacz Reun anhangunden insigeln, und ist daz geschehen do nach Christes gepurd ergangen waren drewtzehen hundert jar darnach in dem vier und sechczigistem jar an unsrer vrawen tag zu der liechtmesse.

Source Fulltext: OÖUB 8 (Wien 1883), S. 165f., Nr. 161