Ich Ulreich von Chranichperg und ich Christian on Chranichperg sein vetter und unser erben wir verjehen offenleich an disem prief, daz wir uns dez mit unsern trewen verlubt und verpunden haben gegen hern Petern von Eberstorf chamra^er in O^esterreich und gegen seinen erben, dez ersten umb zway hundert phunt wienner phenning darumb si mit sampt uns unverschaidenleich selbs gescholcz und gelter warden sind hincz hern Eberharten von Dachsperig hincz Hainreichn und Gundachern von Dachsperg seinen vettern und hincz iren erben, und darnach umb die hundert phunt und sechz und fumfczig phunt wienner phenning darumb si ouch mit sampt uns selbgescholn und gelter worden sind hincz Daviden dem Stewzzen dem Juden Heimlein Gincz von Newnburch und hincz sein erben, daz wir den egenantn hern Petern von Eberstorf und sein erben von der vorgenanten geltschult von christen und von juden als vorgeschriben stet an allen iren schaden ledigen und losen sullen an sand Merteins tag der schierst chumpt. Ta^eten wir dez nicht, wand uns dann her Peter von Eberstorf oder sein eriben vodernt, so sullen wir im zwen erberig chnecht mit vier pha^eriften gein Wienn in ein erberig gastliaws senten und darinne ligen und laisten alz inligens und laistung recht ist und da nimmer ouzchommen, ez werd denn alz daz volfuert daz var an disem prief geschriben stet. Tun wir dez nicht, allen den schaden den si dann derselben geltschulde fürbaz nement dacz christen oder dacz juden wie der schad genant ist das sie pey ieren trewn gesprechen mugen, denselben schaden sullen wir in gancz und gar ablegen und widercheren an alln iren schaden. Si sullen ouch hauptgu^et und schaden haben ouf uns unverschaidenleich und ouf allen unsern erben und ouf allen unserm gu^et daz wir haben in dem lande ze O^estereich oder wa wir ez haben, davon in der landezfürste oder wer den gewalt an seiner stat hat an fürbot und an chlag phant antwurten sol, wenn si soncz nicht lenger enperen wellent alz verr daz si sich selber von irs egenanten geltschulde von christen und von juden umb hauptgu^ot und umb schaden ga^enczleich geledigen und losen und an allen iren schaden wir sein lebentig oder tode. Und darüber so gibe ich Ulrich von Chranichperg in diesen prief ze einz waren urchunde diser sache versigelt mit meinem insigel und mit hern Jansen insigel von Trawn der der sach gezewg ist mit seinem insigel im an schaden, und wand ich obgenant Christan von Chranichperig noch nicht selber insigel han, so verpint ich mich under der genanten insigel allez daz sta^et ze haben und ze laisten daz vorgeschrieben ist. Der prief ist geben nach Christes gepurde drewczehn hundert jar darnach in dem vier und sechczigisten jar an dem vierczehenten tag vor sand Jo^erigentag.

Source Fulltext: OÖUB 8 (Wien 1883), S. 172f., Nr. 169